(ازور) قبرك أرجو منك لو نظرة
فأذن لي إمامي ان آتي إلى الحضرة
أسري اليك بعطفاً منك لا قدرة
من ذا اكون لكي أمشي إلى السدرة
أزورك والزيارة واجبة ولو بالعمر مرة
ازورك والزيارة إدري بألف حجة وألف عمره
أزورك واليزورك ينحسب أجره على الزهرة
اليحج بيت الله كون بحجه ينوي ويقصد القربة
وأنا بهاي الزيارة قاصد القربة بذوي القربة
أنا عبدك شهد بأسمك دليلي والقلب غربه
جوارك اسمح القلبي أيتدنى ومنزلي قِربه
دخيلك ،، خادمك ،، عبدك ،، يتيمك لايذ بسدك
دخيلك لايمر يوم أربعينك وأنا مو عندك
دخيلك هالوعد لحظه على لحظه عايش انتظره
أزورك والزيارة واجبة ولو بالعمر مرة
ازورك والزيارة إدري بألف حجة وألف عمره
أزورك واليزورك ينحسب أجره على الزهرة
اليحج ينزع مخيطه وفلسفتها ينزع ذنوبه
ومثل أحرامه يجعل قلبه أبيض هاذه مطلوبه
لچن كلمن يجيك أحرامه أسود والحزن ثوبه
وزيارة قبرك أسرع كلطرق للرايد التوبة
طريقك لليريد الله يحبه ويقضي حاجاته
طريقك يمشي بيه المهدي حتماً ويه عماته
طريقك للذي رايد يواسي زينب الكبرى
أزورك والزيارة واجبة ولو بالعمر مرة
ازورك والزيارة إدري بألف حجة وألف عمره
أزورك واليزورك ينحسب أجره على الزهرة
اليحج يجمع حصى والغاية منها يرمي شيطانه
وحصى الزاير دموع عيونه يرمي بيها عدوانه
اليحارب هلمشي ويعلن عدائه بيده ولسانه
تحت اقدام كل زاير مصيرة تالي وأمچانه (امكانه)
أجينا وهذي مشيتنا رسالة لليعادونه
أجينا والسواد اللي نكثره شوكة بعيونه
أجينا والمحب يطلب وصالك ماطلب أجره
أزورك والزيارة واجبة ولو بالعمر مرة
ازورك والزيارة إدري بألف حجة وألف عمره
أزورك واليزورك ينحسب أجره على الزهرة
أبمنى اترابك منى روحي احقق وابلغ الغاية
بطفوفك أزدلف وابربعينك امشي مشاية
حضوري بعرفه عندي حضوري بمجلس قراية
واعيّد عيد الأضحى يوم أضحي بدمي للراية
اطوفك وبصحن قبرك أكمل سبعة أشواطي
اطوفك وأسعى وي زينب من التل اوصل الشاطي
اطوفك ياستار الكعبه لاچن (لكن) منهتك سترة
أزورك والزيارة واجبة ولو بالعمر مرة
ازورك والزيارة إدري بألف حجة وألف عمره
أزورك واليزورك ينحسب أجره على الزهرة
يكعبة (ياكعبة) ربنا والرُكن اليماني مرقد اصحابك
اذا بيت الله ميزابه يتفايض اصله ميزابك
أستلامي للحجر الأسود أجيلك وأستلم بابك
سجودي لله سبحانه وتعالى يحلى بعتابك
أجيلك جية الظامي على مايه لهفه يتعنى
أجيلك لاني خايف من جهنم لاردت جنه
أجيلك عايف الدنيا ورايه بس ردت نظرة
أزورك والزيارة واجبة ولو بالعمر مرة
ازورك والزيارة إدري بألف حجة وألف عمره
أزورك واليزورك ينحسب أجره على الزهرة
على حجك كل خليجي وشامي جاي وعايف أدياره
وأجى تعنى الرضا بِنيران شيعه بهاي الزيارة
يجي خطارك وشفنا العراقي أيحسبه خطارك
من البيشه وتصل للناصرية كوت والعمارة
مواكب كلها نادت ياحسين بصافي النية
مواكب حلة ،، بغداد ،، سماوة والديوانية
مواكب سفرة وحدة من النجف وي سفرة البصرة
أزورك والزيارة واجبة ولو بالعمر مرة
ازورك والزيارة إدري بألف حجة وألف عمره
أزورك واليزورك ينحسب أجره على الزهرة