تمنيت يما تبرا و تعيش اك شفت ربي مكتبهاش
لي جابتني لـهاذ الدنيا عاشت حياتها مريضة فراش
نهار راحت حبيت نلحق ماقدرتش نزيد نهار فالحومة
وليد بوروبة اسم قديم ليوم ولى وليد المرحومة
بالاك تسمع حكايتي نغيضك و أنا جامي راح نتلاقا بيك
أحكم يماك بوسها من الجبين قولها: تاع مهدي من لاكابين
متقوليش يجوزو ليامات يما موحال راح ننساها
فـ يدي تصاور و فـعيني الدمعة ياك كل ليلة نساهر
فـزمان عندي ماقاصيت لحلاوة راحتلي مع الباسي
بقالي ندعيلها بالرحمة و ندعي لروحي بآمد قصير
حامد ربي كي لميمة فـالحياة بييا فرحت و رضات
كلمة مني فكل عيد الأم نجي فوق قبرك و نحط وردات
شايف العيب من ناس قراب ملقري مازال مابرد التراب
مغطي بالضباب عايش وحدي و نربي فـغراب avenir شايف
نحكيلك همي و تسمعيه وانا لصوتك راني محتاج
ملي رحتي داوني لمواج mi amor توحشتك ماما
حرم عليا نوم اليل ، هاد التخمام منو مليت
يما وصاتني مانخلي عدويا باش يدومنلي
مع الغايب لي مايولي ، les souvenirs بين عينيا
فراقك فهمني بلي فـ هاد الدنيا ماكانش لي يدوملي
علابالي حاجة ربي قاع لي جاتني راهي مكتبة
مي صعيب الشي كي تغيب عليك لميمة بلا متقولك: قود باي
"نحكي حكايتي و ناس تقول: "مين راك تجيب فهاد القصص؟
شحال من طبيب موتو على يدي كون جينا نحكمو بالقصاص
انا لي بـكلامي نفرح فـالناس في قلبي همومي مايخلاصوش
كل مانتفكر بلي دفناك نلقى روحي مطلع جبل بـ لاصوندر
يا لي رفدتيني نهار لي طحت l'hôpital فـ تلاقينا و تفارقنا
زهري معروف على العام خاسر يلعب ما بين الرابطات
قوليلي شكون راح نعنق فـ العيد قريب ينشفوا دموعي من العين
كون تشوفي شكون راهم يديرو معانا فالعيب ماما تتبراي منهم فـ الحين
خلي حكاياتهم يجوزو تهميني انتِ ترقدي هانية
مشبعتش منك فـ هاد الموند إن شاء الله نتلاقاو فـ الحياة الثانية
ربيتيني راجل و راح نبقى وين مانكون حاكم قدري
نخلي وصايا و الناس شاهدة كي نموت قبرك هو قبري
كلام طويل و ماراحش يخلاص ، الجمرة شاعلة فوق قلبي
العبد ضعيف فـهاد الدنيا مولاها ربي، مولاها ربي
حرم عليا نوم اليل ، هاد التخمام منو مليت
يما وصلني مانخلي عدويا باش يـدوملي
مع الغايب لي مايولي ، les souvenirs بين عينيا
فراقك فهمني بلي فـ هاد الدنيا ماكانش لي يدوملي
إإه وي توحشتك ماما ، بارح كنت نحط راسي فـصلاة و نقول يا ربي شفيلي يما
وليوم وليت نقول يا ربي رحمها ، ماشي ساهل فراقك بزآف صعيب مور ما رحتي
ماجازوش عوام يامات برك ، ناس بزاف تبدلت ، حكايات بزاف تبدلت ،
حياتي بزاف تبدلت ... مابقالي غير نقولك ربي يرحمك ماما