منْ دَيرِ جْرَبْتا الهَادي
بَينِ التَلِّي وِالوادي
الأجْراسِ بْصَوتِ الشَّادي
تْصَلِّي مِنْ تَلِّي لْتَلِّي
عَنَّا يا رَفْقا صَلِّي!
يا عَينْ رَفْقا الْغَفَّاها
عَتْمِ الدِّنْيي وطَفَّاها
وِبِالنُّورْ رَبِّي صَفَّاها
عَلْينا سِهْراني ضَلِّي
وعَنَّا يا رَفْقا صَلِّي!
يا راهْبِه الرَّبِّ اخْتَرتِ
وكِرْمالُو العُمْر نْدَرْتي
ومِنْ كَاسُو الْمُرِّ سْكِرْتي
بْهاكِ الحُبِّ البِيخَلِّي
عَنَّا يا رَفْقا صَلِّي!
يَسُوعْ بِالدَّيرِ خْدَمْتي
وعَ بْيُوتِ النَّاسِ بْرَمْتي
وأَطْفَالْ يا ما عَلَّمْتي
وكِنْتي عَ الخَيرِ تْدِلّي
عَنَّا يا رَفْقا صَلِّي!
يا قَلْبِ الكِلُّو شَفْقَة
وعَمْ يْدْفُقْ خَفْقَه خَفْقَه
مِنْ إيمانِكْ يا رَفْقا
خَلِّي دِنْيِتْنا تْمَلِّي
وعَنَّا يا رَفْقا صَلِّي!
مِنْ عَيشِكْ لِلقِرباني
صِرْتي قِرْبانِي تاني
بْعَتْماتِ العُمْرِ الفاني
لَحِقْتي النُّورِ الْمِتْجَلِّي
عَنَّا يا رَفْقا صَلِّي!
لبْنانْ كِلُّو مَعْ أَهْلُو
شْمالُو وجْنُوبُو وسَهْلُو
وأَرْزاتو عَمْ تِنْدَهْلُو
يحِبُّ وِيغْفِرْ وِيصَلِّي
عَنَّا يا رَفْقا صَلِّي!