القاتل البسفك دمانا
ليه رمانا؟
ليه تموت أحلام صبانا؟
ما رعانا
ربي هو البسمع دعانا
هو المعانا
ما البفوت ما ليو حصانة
ما برانا
يا بلاد نيلك دمانا وعشنا فيك جراح
كم شهيد فارقنا غادر خلا طيفه وراح
قاتل الأطفال بكابر كيف في يوم يرتاح
أمه رافعة اليد تنادي و ما بعيش سفاح
أعدمونا
غربونا
تبقى كلماتي بتصارع في سجونا
عذبونا
أقتلونا
شيلو روح كرهت وجودكم و أحرقونا
قال داكا قصاصو و قال
الحال هو الجاب الحال
فرعون بي جلالتو و زال
تحكيك أيام و أجيال
ليه تعاون في البسمي الدم عمار إصلاح
في رقابكم دم ضحايا وذنب ما بنزاح
قلة من قال الحقيقة منو البقول الصاح
كيف قدرتا تنوم وتنسى وليه تموت أرواح
القاتل البسفك دمانا
ليه رمانا؟
ليه تموت أحلام صبانا؟
ما رعانا
ربي هو البسمع دعانا
هو المعانا
ما البفوت ما ليو حصانة
ما برانا
شفت كم عين بيك بكت منك شكت
عمرو ما راجع ضميرو وكيف ضمير إنسان سكت
كيف نسيت راجيك لحد وربك أحد
ليه بقول نحن الخراب ليه بكابر ليه جحد
سرنا في دربك سنين ولقينا دربك ضر
ما الشباب غادر ديارو وشاف معاك المر
سطر التاريخ مسيرتك ظالمة ما بتسر
الحياة العشناها حرة وما بموت الحر
يبقى باقينا يحكي ماضينا
ضحكة الأطفال تثور ومنو البهدينا
يا أماسينا مرة واسينا
قلنا سلمية ولقينا الموت ينادينا
بحكي عن أرض الأسود أفداك يا سودان
لو نموت نحنا ونفوت وترابو ما يتهان
ناقصة كلماتي في هواك ألحاني ما ألحان
يا عزيز تفضل عزيز ما يبقى فيك سجان
القاتل البسفك دمانا
ليه رمانا؟
ليه تموت أحلام صبانا؟
ما رعانا
ربي هو البسمع دعانا
هو المعانا
ما البفوت ما ليو حصانة
ما برانا