D'Lüt chömed vo allne Siite
Zähtusig und meh
Me chömed d'Heiligchrüzstross durab
Zum Sangalle gäge GC z'gseh
Ich und min Vater
Er diskutiert mitme Fründ
Ihri Matchprognose, dass GC drü zu eis gwünnt
GC isch Seriemeister
Und scho wieder uf em erste Platz
D'Sangaller füfti
Nochem Sieg im Nochtragsspiel gege XAMAX
Aber geg GC hends kei Chance
Di halb Nati spielt bi dene
Hermann, Koller, Wehrli, Sulser, Egli
Nur scho all die Näme
Charlie Inalbon, Raimondo Ponte heissed d'Spieler
Und im Goal hends de Bärbig
Und mir hend de Huwiler
Siit siebe Spiel nüm bezwunge
De Doktor Roger Bärbig
Und de FC Sangalle het uf de Liibli Fido-Werbig
Fido, Hundefueter
Me mues hald neh was chunt
I het au gern en Hund
Und ez gohts no e Viertelstund
Es het grägnet vorem Spiel
Und de Platz isch nass
Und am Spielfeldrand hi und her laufd d'Securitas
I stoh ufeme Harass
Und Fuesball intressiert mi gar nöd so
Also au nöd grad nöd
Also irgendwie scho au scho
Aber i find au Busschaufföre guet oder Securitässler
Zum erste Mol im Espemoos
Als Zweitklässler
Denn chömed dSpieler uf de Platz
Und denn fangeds a tschutte
Und s'erst Goal fallt scho ide achte Minute
De Paul Fryberg träfft zum eis zu null fürd Sangaller
Nochme Abpraller vom Koller isch de Friberg schneller
Als drü Gegespieler
Für de Bärbig ufem falsche Fuess gits nüt z'hebe
Aber ebe
Nume ei Minute spöter
Usglich GC
En Freistoss vom Jara wird lang und länger
De Huwiler chunnt use
Vergebe, fuustet denebe
Und de Andi Egli mues nume no de Chopf anehebe
Und ez fähled GC nur no zwei zum drü zu eis
Het jo min Vater prophezeit
Will min Vater alles weiss
Aber nei Sangalle chunnt scho wieder
Und verpasst zweimol knapp
Und zwei Schüss vo GC wehrt de Huwiler ab
Es goht hi und her
Und de Platz isch schwer
Und Sangalle stöhrt früeh
Und GC het Müeh
Denn de Inalbon lasch
Ballverlust, de Braschler vernascht en
En Rush in Sechzehner
En scharfe Pass vors Goal
Und de Friberg haut de Ball id Masche
Und Sangalle füert zum zweite Mol
Und denn isch irgendwenn Pause
D'Spieler gönd id Kabine
Und mir schiffed as Gitter
Hinder de Gegetribüne
Und egal obd Sangaller hüt verlüred oder gwünned
E drü zu eis für GC wird da ganz sicher nüme
S'drü zu eis fallt denn doch no
Ide sechzigste Minute
En Wiitschuss vom Hächler direkt under d'Latte
Nochem vier eis vom Braschler fangts wieder a schiffe
Und jetzt fangeds au di erste GC-Fans ah begriffe
De Match isch gloffe
Di einte mached sich ufd Reis
Und verpassed denn am Gisinger sis füf zu eis
Füf eis für Sangalle
Jetzt no en letschte Corner nei
De Schiedsrichter pfift ab
Aber me wönd nonig hei
Me gönd no ad Kolumbanstross ufe
D'Grosseltere go bsueche
Verzelledne de ganz Match und essed Generosochueche
Und i wünsch mer e Fido-Liibli
Aber kei Selbergmachts
So isch da gsi am 19. März 1983
S'erst Mol am Match
Und immer wieder siit döt
Und s'erst Mol dass min Vater
Nöd recht gha het
S'erst Mol am Match
Und immer wieder siit döt
Und s'erst mol dass min Vater
Nöd recht gha het
S'erst Mol am Match
Und immer wieder siit döt
Und s'erst Mol dass min Vater
Nöd recht gha het