واصل لمرحلة اللامبالي بدال ما احكي
مع بشر قاعد عم حاكي حالي
منعزل بغرفة صغيرة كل شي حدي مكسر
كل ما احصل ع مفتاح دنيا بيطلع بابا مسكر
قدامي كاسة شاي باردة متل قلوب الناس
ورق وشوي افكار جمبا حب وجع راس
بين اربع حيطان كاتب عليها ذكرياتي
حدي صندوق معتق مخبي فيو ضحكاتي
مليت من اخبار الموت قتل الناس موضى
مليت من الوضع لأنو صار الوطن فوضى
مسكر بابي خايف اطلع شوف وجوه ناس سودة
كأني بحار تايه داخل مثلث برمودا
فحوى محتوى الفتاوي راح تقسمو الشيوخ
العقل زينة لكن يلي حامل العقل مسلوخ
انسان عابس راقد فاقد الامل من حالو
من جسمي شايل القلب حاطط حجر بدالو
كل ما نطلع من قاع مننزل لقاع تاني
عم يتلحن الوجع على وتر ايقاع فاني
منسوب مستوى الثقافة صاير مُنخفض
متل فيزة شب سوري مصيرا ترتفض
يا دنيا زيدي حمل
انا كتفي جبل مهما قلبي شاب
يا دنيا زيدي حمل
انا كلي وجع وبقلبي هم
ولا ممكن انكسر يوم حلمي مكانه بين النجوم
يا دنيا لك زيدي دوم انا حملي حملي انا جبل هموم
مليان وجوه ... كلا اقنعا مزيفة
بالدينا توه ... بتلاقي العقول مغلفة
في النا رب ... ديماً حاول اطلب الامل
من برا شب ... من جوا شايب بلا عمل
بداري فيكم لكن ماحدا بداري
ف بستكن مع دماغي منعزل بداري
لحالي بلاقي حالي بسأل وباخود جوابي
عالمي بسيط غرفة مسكر فيا بابي
كلو ناطر حتى تنكسر صديق عدو ودود
مصيرو الكسر ينجبر حتى العضام تعود
ولما صرت شب زارت بلادي حرب وسخة
صار من هتلر و فرعون عنا ميت الف نسخة
حاسس حالي صياد بغابة كلا وحوش غاضبة
كلو مكشر على انيابو بعيونو نظرات ثاقب
عقلي طالب عزلة حتى يعتزل وجوه الناس
لانو العقل زينة وحدو كافي حتى يعبي الراس
طيب حضرا لبلادي يلي كانت خضرا
الناس اتدوب من جمالها لما يميل خصرا
لما احكي عن وطن ميت بتزيد النبرا
الشام اخت بيروت فـ قاسيون ابن صبرا
يا دنيا زيدي حمل
انا كتفي جبل مهما قلبي شاب
يا دنيا زيدي حمل
انا كلي وجع وبقلبي هم
ولا ممكن انكسر يوم حلمي مكانه بين النجوم
يا دنيا لك زيدي دوم انا حملي حملي انا جبل هموم