Kung ako sa 'yo tumayo ka na diyan
Huwag ka nang magpahuli, kami ay sundan
Patungo sa liwanag, abutin ang tala
Pagkatapos pakita sa mundo pusong nagbabaga
Upang lahat ay mamulat sa aking susulat
Parinig sa lahat ang aking ulat
Huwag mabahala, ako ang bahala
Kasangga natin si Bathala
Ikaw na umibig sa kanya, umibig ka pa
Ibigin mo siya sa kabila ng kanyang mga pagkukulang
Ibigin mo siya para sa kanyang mga pagkukulang
Basta't umibig ka pa
Ito ang iyong pagkakataon, ang hinihintay na sandali
Maging mas malaki, maging buo, maging parola sa dilim
Naghihintay ng darating sa 'yong dalampasigan
Maraming naliligaw sa karimlan ng karagatan
Maging pantalan, buksan mo ang iyong mga kamay
Para sa pagragasa ng mga alon
Sanayin ang iyong dibdib sa pagtanggap
Sa kanilang mga inaanod, hindi lang sa kanya, umibig ka
Ibigin mo siyang mukhang 'di maalala
Sa araw-araw na pagsakay ng tren
Silang ibang wika lang ang kayang bigkasin
Silang duguan, silang markadong makasalanan
Ibigin mo ang batang nag-aalok sa 'yo gabi-gabi ng bulaklak
'Yan ang halimuyak ng isang kuwentong nagpupursige
Sa labas ng 'yong mundo, ibigin mo ang kanilang mundo
Ilabas ang 'yong pangarap
Huwag mo 'yang itatago
Samahan mo ng sipag at tatag ng puso
Tumayo ka sa 'yong silya
Ikaw ngayon ang bida
Wala nang pipigil pa, 'eto na, 'eto na
Ibigin mo 'tong mundo sa kabila ng taglay nitong dilim
Hayaan mo ang sariling magningning
Tandaan, ikaw ay anak ng araw at mga bituin
Kaya mong kuminang, isinilang ka man sa gitna ng gabi
Kaya sindihan ang iyong ilaw
'Wag mo itong ikahiya, ngayon higit sa kailanman
Kailangan ng mundo ang iyong apoy
'Yang alab na walang tinutupok na lungsod o kagubatan
Walang inaabong bahay dasalan o sayawan
Walang inaabong silid-aralan
Walang pinapatay ang pag-ibig
Kun'di ang dilim
Kun'di ang dilim
Hanggang ako'y humihinga
Sugod lang, laban pa
Pangarap abutin
Kumislap tulad ng mga bituin
Sige lang, 'di ka nag-iisa
Sige lang, sige pa
Kaya heto, ito ang iyong imbitasyon upang magliyab
Heto ang balitang ituring mong panggatong
Heto kaming mga kaibigang liligid sa 'yong siga
Nakaupo sa buhangin, nakabantay sa dalampasigan
Makikinig sa kuwento at pipilitin
Na piliin ang pag-ibig sa simula hanggang huli
Mahaba pa ang gabi
Pero maningning pa rin ang ating apoy sa tabing dagat
At sinong umiibig ang hindi handang magpuyat?
Sinong umiibig ang hindi handang magpuyat?
Walang imposible, sige lang, sige
Abot mo ang mundo
Malapit, malayo, sama-sama tayo
Hanggang sa dulo
Ano man ang pagsubok
'Di susuko, alam kong kaya mo
Sige lang, sige, sige lang, sige
Walang imposible (whoa-oh-oh, whoa-oh-oh)
Walang imposible (whoa-oh-oh, whoa-oh-oh)
Walang Imposible (whoa-oh-oh, whoa-oh-oh)
Sige lang, sige, sige lang, sige