BEAMBTEZJWEET
Ze hauwe 'tzelfde: ing koalzjwatte moel
Mar versjil mot zië, zelfs deep iggen koel
Ze zjwidde tesame d'rzelfde zjweet
En tóch woar - dat rookste - e groët ongersjeed
D'r wirkmaan deë zjwidde zie simpele voch
D'r vaarsjtieger hauw al ing beëtere loch
Mar d'r hoofdingenieur, deë weledelgeleerde
Deë kos gaar neet zjwete, deë heer transpireerde
Zoëgaar went ze naksj in et wäschlokaal zonge
"Poekel miene ruk va boave,
Busjtel ich dich van onge."
Dan hauw d'r beambte, dat zoogste god
Ummer et groêtste ei iggen vot
D'r sjlepper, d'r heujer, d'r koalfrontsoldoat
Woare koelemployees van et mindere soat
Diek in de moeskele, mar nieks in d'r kop
Daorum deë beambte - deë pásde d'rop
Deë keek gans geliërd wie et werk woëd gedoa
En wente get zjweet volt, dan zatte zich doa
Och in dat wit hoofdkantoër rookste gee zjweet
Dat hong dan och sjeef van de voeligheed
REFREIN; Zoëgaar went ze naksj in et wäschlokaal zonge
D'r koelpiet woar 't wirkpeëd, 'ne eëzel mit krach
D'r beambte'ne Herrgod mit hiëmels gezag
Deë hauw gesjtudeerd, twië joar mulo op zie minst
En dat brach d'r beambte ee aandeel in de winst
Deë wonde och get beëter, conform ziene sjtand
Neet in de kolonie, mar inne ruum beambtepand
Gong noa zie casino, neet noa et patronaat
En kreeg och get mië van et koaledeputaat
REFREIN; Zoëgaar went ze naksj in et wäschlokaal zonge
D'r sjtieger deë kreeg enne dartiënde mond
D'r sjlepper kreeg oerloën, dat loog an d'r bond
D'r beambte woar duur, ziene pungel goedkoop
Och doa sjeet d'r duvel op d'r gruuëtste hoop
Toch hauw deë beambte d'r kop deks vol zörg
Went deë heem koam woare ram veëdig en mörg
Dan kuumde heë: vreujke, wat bin ich kapot
Durch et sjleepe van dat extra ei in mieng vot