DAAGSJIECH
Naat, gries en vaal kömt d'r mörge in de sjtad
Langs de sjting van de hoezer
Kruupt langzaam d'r niëvel
Van huuske noa huuske - van giëvel noa giëvel
Nóg sjliëpt de sjtad, heur sjtroate zint nog duuster
Mar de auw kolonie begint te leëve
Doa liët enne haan zich huure
Ing wekkersjel die klinkt
Et geet noe gebuure
De nach sjturft langzaam, mar d'r daag, deë neuje daag
Deë is nog neet gebore
De iësjte doeve fladdere op d'r sjlaag
En wachte op et grieze ochtendglore
Doa floept e leech, ing kuuëkeduur geet oape
Op et höfke sjupt 'n vrouw ing kit mit eierkoale
En geet vrissje witte bej de honder hoale
E peëd mit milkskaar, vol rammelende teute
Sjörgt langzaam op weëg nao de fabriek
Koalezjwaam drieft vuurbej, vermengd mit kaffiëruuëk
- Me sjnoeft och al sjpek en ei
De nach sjturft langzaam, mar d'r daag, deë neuje daag
Deë is nog neet gebore
De iësjte luuj, die komme oet ge bed
Mit dieke oge en mit sjtroevelshoare
D'r iësjte sjtap klatsjt hol durch de sjtroate
Mar get later komme ze van alle kante
Duustere gesjtalte, wie sjimme in de nach
Oet de hoezer woë die iësjte leechsjkes brannte
D'r lampepoal, doa komme ze neuj bejenee
Mórje Sjef, hoj Wiel, dag Hein
Op et sjtuupke vuur e hoes zitte ze op de huuke
En zjwiege, sjtillekes wie 'n moes
De nach sjturft langzaam, maar d'r daag, deë neuje daag
Deë is nog neet gebore
De iësjte koelluuj, och ze dreume nog
En woolle dat ze igge bed nog woare
Mit pupsje oge in bleke, hoal gezichte, gries en vaal wie d'r mörge
De patsj sjeef op d'r kop
'Ne Sjtoemel in d'r monk
En 't broëd in 'n auw gezet gesjtopt
D'r bleëk is vol, d'r blauwe pungel ronk
De koelbus mot noe komme
Mit 'n knieze moel
Zitte doa os koelluuj - wer veëdig vuur de koel
De nach sjturft langzaam, mar d'r daag, deë neuje daag
D'r neuje daag, deë is nog neet gebore
Mar de iësjte koelluuj zient et - kiek mar doa
Begint d'r mörgehiëmel al te kloare
Kòd, graam en kaal
Bliëst de koeltuut heure sjrei in d'r vale naksje mörge
Gans langzaam sjtond ze op -nog zjwaak iggen kneje en zjwoar in d'r kop
Doa kömt de bus - ze kroepe neëvenee - doa is 't werm wie heem in bed
Ze sjloape op de banke - zoë viert ze voet, de bus, die hoddelsbus
Mit kranke
De nach sjturft langzaam, mar d'r daag, deë neuje daag
Weëd in d'r sjach gebore
Mar vuur d'r koelmaan geet d'r neuje daag in et duuster
Van de nach verloare...