I lahn mitn oidn Herrn Walker
Auf an Plausch an da Bar
Do mochts an Poscha und an Tuscha
Und es gibt a muads Gschraa
Es is da Polifka-Rudl, und er kummt
Durch de zuagmochte Tia
Im Retourgang durchs Milchglos
Schleift se ein nebn an Walker und mia
Da Polifka-Rudl is normal
Sanft wia ein Lamm
A stiller Witwer und Zecher
Und so dürr wia mei Dam
Er woa im Handl-Kino
Guade zwanz'g Joa Billeteur
Wechseit jetzt Zehner in da Peepshow
Und er heat a scho schwer
"Rudl, heast", plärr i
"Wos isn gschehn?"
"Frog mi ned", keucht er
"I hob sowas no ned gsehn."
Er scheppert wia a Kluppensackl
Und sogt: "Mia geht's anan Krogn!"
"Ah wos, Bledsinn", sog i. "Jetzt red scho!"
"Huach", sogt er. "Oba ned weitersogn!"
"Bitt ich, heast!"
I kumm heit aus da Hockn
Eh scho z'spod
Hob no g'wart auf die Rikki
Weus heit Spätschicht hod
Fesche Gretl die Rikkl
Kennstes eh
Oba kennst ihr neiche Nummer
Weltspitze, ohne Schmäh
Wos wollt i sogn? Ahjo
I tummel mi
Weus im Kabel die
"Unbestechlichen" spüd
Siech i an Wogn
Der wos ma folgt
Ohne Nummernschüd
A so a Gefährt
A richtige Limousin
I schau und i schau
Und wer glaubst sitzt drin
Nau rat! Auf des kummst nie
I hob glaubt, i spinn
Da James Cagney
Und des heite
Mitten in Wien
Des woa er, des schwör i
Weu bei dem kenn i mi aus
Mein Cagney den kenn i
Do loss i kan aus
"Chicago", kennst?
Spitzenfilm. Hundert Moi gsehn
"Angels with dirty Faces"
Im Original. Wegen an
Cagney sein Reden
Er woa ka Guada
Und er woa a ka Büd von an Mann
Oba wan er so gredt hod
Auf Englisch, uh
Do scheißt di an
Sog i: "Red weida, Rudl!"
Drauf er: "Wo woa ma grod? Ahjo
I hob oiso gschaut
Kummt ana von hint
Der wos ma voll ana
Am Buckl haut
I fahr umadum, is des
Der Flurschütz-Toni
Wirst ned kenna
Der woa vuam Kriag
A so a Schwimmkanone
Er hätt jetzt an Platz
Im Heim in der Ölweingassn
Über sein Buam
Der is a hechers Viech
Bei die Genossen
Da Toni redt und redt
Er is a bißl a Lamentiera
Endlich bring i eam an
Geh die Dings-Gassn vira
Is do wieder de Limousin
Schwarz wia die Nocht
Mitn Cagney drin
I siech wia er locht
Sei gfährlichs Lochn
Jetzt steigt er aus
Wos soll i mochn?
I hea den Cagney wos sogn
Auf Amerikanisch
Do hau i die Nervn weg
Und renn wia panisch
I renn und er rennt
Jo und dann bin i gfalln
Oba nix weidasogn
Bitt ich, heast
Tua ma den Gfalln
I denk ma, den Rest
Von sein Schwank
Soll er in oidn Walker dazöhn
Bei dem is er guad aufghobn
Und i werd daweu gehn
Sog no: Ois halb so wüd, Rudl
Und bin scho draußt bei da Tia
Do siech i a muads Limousin
Und a schwarzweißer Cagney
Baut se auf vua mia
Der sogt: Des bleibt jetzt unter uns
Und jetzt geh brav ham
Denk da ned z'vü, denk da
Des is ollas nua a Tram
Oba i denk an an Rudl
Do steßt er mi weg
Von da Tia und sogt
Es is no a oide Rechnung offen
Zwischen dem Rudl und mir