Beidi händ g'redt und au beidi händ rächt
Und zwei Augepaar lueged mich aa
Ich spilä doch d'Rolle als Richter so schlächt
Und ich liidä ja sälber da dra
Zwei wo sich gärn gha händ, stelled jetzt fescht
äs hät nur für ä churzi Ziit g'langt
Und ich sött bestätige, s'wäri doch s'Bescht
Wenn jetzt jede vo neuem afangt
Jetz chan is säge, so ganz hinedri
Ich bi no nie
So ratlos gsi
Z'erscht packt eim fascht wien ä Wuet und me seit
Aso redet doch zerscht mitenand
Ä Beziehig läbt erscht, wänn si s'Striitä vertreit
Aso stecked doch d'Chöpf nid in Sand
Mer merkt aber glii, alles Rede chun z'spat
Sind ja Gfühl, wo nid wüssed wohi
Und äs Gschpüre lost nid uf dä beschtgmeinti Rat
Da dra chunt au en Fründ nöd verbii
Jetz chan is säge, so ganz hinedri
Ich bi no nie
So hilflos gsi
Vorwürf und Träne, ä Luft wo schier bricht
Und ganz luut tigged plötzlich än Uhr
Alls luegt an Bode nur ja nid is Gsicht
Und dä Wii i dä Gläser schmöckt suur
Fascht chunt mer sich als dä Dritti im Ruum
Grad wi fremd und als Idringling vor
Ghört hät vill und ä Hilf isch met chuum
Nid nur ich sueche jetzt s offe Tor
Jetz chan is säge, so ganz hinedri
Ich bi no nie
So vorig gsi
Zwei händ jetz plötzli zwei trännti Wäg gno
Welem gaht mer als Fründ hinedri
Bliibt mer nöd wien ä Erinnerig sto
Und die Zwei lueged lieber verbi
Villicht händ do sich i säbere Nacht
Nid nu zwei won ich gern ha verloo
Villicht hät Trännig au mir liis und sacht
Zwei vo dä beschte Fründ gno
Jetz chan is säge, so ganz hinedri
Ich bi no nie
So truurig gsi