Im Hauptbahnhof stiigsch ii in Wage
Und möchtisch dänn, so bald's dänn fahrt
Din zimli leere Chnurrimage
Neu fülle mit dem uf de Chart
Du zwängsch di zu mene Gedeck ie
De Tschoope leisch is Gepäck mit zue
Entfaltisch d Ziitig über s Bschteck ie
Und freusch di uf es bitzli Rueh
Es Fläschli Wii schtaat scho am Feischter
De Garçon fröget "Soupe, Monsieur?"
De Chef en place und d Chällermeischter
Empfehlt dir sehr de Beaujolais
De Zug saust dur de Bahnhof Schlieren
Wo s dänn zum ertsche Mal passiert
Dass ufere Weiche bim probiere
En Suppesprutz dis Hämd garniert
Bi de Iifahrt in Killwangen
Dörfsch dr Brot is Chörbli lange
Und im Tunnel churz vor Baden
Wird Salat in Täller glade
I de Kurve dert nach Turgi
Merk i dass i z spaht bi, wurgi
Als dä letscht vom Coupée-Grüppli
S letschti Flädli us em Süppli
Gibe s Gschirr am Chällner zrugg
Und chumm Erbsli über z Brugg
Gli druffaabe zmitts in Schinznach
Fülled's eim ein Stück des Rinds nach
Und sobald me Frick mag gseh
S zweiti Mal pommes ris-so-lées!
Im Hauptbahnhof stiigsch ii in Wage
Und möchtisch dänn, so bald's dänn fahrt
Din zimli leere Chnurrimage
Neu fülle mit dem uf de Chart
Du zwängsch di zu mene Gedeck ie
De Tschoope leisch is Gepäck mit zue
Entfaltisch d Ziitig über s Bschteck ie
Und freusch di uf es bitzli Rueh
Es Fläschli Wii schtaat scho am Feischter
De Garçon fröget "Soupe, Monsieur?"
De Chef en place und d Chällermeischter
Empfehlt dir sehr de Beaujolais
Z Mumpf gits Gruyère, Appezäller
Und e Fige uf de Täller
Z Möhlin scho de Kafi Schnaps
Präventiv gäg Darmkollaps
Wer mit cho will bim Dîner-Ränne
Im Schwizer Wagon-Restaurant
De sötti d Statione känne
Demit er s Ässe richtig plant!
Wänns Muul e kei Sekunde läär isch
S Mässer ohni Pause schniidt
S Gläsli mit em Wii wo schwer isch
Immer a de Lippe liit
Links de letzschti Rescht Glacé
Nimmsch rächts zum Sack uus s Portmonee
Dänn schafft mer mit es bitzli Massel
S Menü ring vo Züri bis uf Basel!