بنزول الماية في الكوباية أنا بدأت أفهم
فشوفت النص الفاضي منها فاستغربت بضحك
بضحك على الأيام اللي عدت في الحزن واليأس
ولا شايف نصها المليان فلا بأس
عادي مش مهم عدت ومش هتكسر
عرفت أسباب كتيرة عشانها لازم ابتسم
وشُفت إزاي بكلمة واحدة البسمة ممكن تترسم
زي كل سنة وأنت طيب مبروك ونورتنا
ياريت نشوفك تاني وتبقي واحد مننا
وأديني بفتكر وإزاي أنا كنت بشتكي
وأقول ده العمر عدى فات ده إحنا لسه بنبتدي
هفكركوا واحدة واحدة يا ريت تستحملوني
أوعدكوا بإبتسامة لو كملتوا تسمعوني
فاكرين أجازة آخر السنة كل سنة
وحلاوة النجاح لما تنجح أنت وأنا
وحلاوة النجاح لما تنجح أنت وأنا
ياه حلاوتنا لما نرضى بحياتنا
ياه وقلوبنا فاتحينها لخلق الله
ياه حلاوتنا لما نرضى بحياتنا
ياه وقلوبنا فاتحينها لخلق الله
♪
أنا فاكر المحبة والعشرة والصحاب
والكورة الساعة ستة والشورت والشراب
وحوش المدرسة في الفسحة مليان بالصحاب
والشنطة قاسمة ضهري وفيها مليون كتاب
أيوه فاكر عيد ميلادي والتورتة والشموع
واللعبة دي عايزها وأقعد أعيط بالدموع
وعيد ورا عيد بيجي، طب فين العدية؟
يا بخت عم محمد البقال اللي تحتيا
خلصت فلوسي كلها ع البوظو واللوليتا
مبروك البوية الجديدة مكتوب على كل حيطة
ذكريات كتير عبيطة بس كانت أيامنا حلوة
أيوه كانت أيامنا حلوة والمشاكل كانت بسيطة
كل لمّا نكبر أكتر تكبر همومنا تزيد
بقيت إنسان جوه منه محبوس طفل مش سعيد
الدنيا بتاخد فينا وتودينا وتنسينا
ونروح نتوه ندور ع السعادة وهي فينا
آه بحب السعادة وبحب اللي بيسعدوني
وبحب اللي وقفوا جنبي لما غيرهم كسروني
وبحب المزيكا لما تعلى في العربية
وبحب ليلة العيد والسهر على مسرحية
وبحب لمّا اللمة تكمل بينا ع الغدا
وبحب سهر الصيف، وبحب برد الشتا
وبحب المدرسة وصحابي اللي بقيوا منها
وكل حاجة بسيطة بنحبها وناسينها
ياه حلاوتنا لما نرضى بحياتنا
ياه وقلوبنا فاتحينها لخلق الله
ياه حلاوتنا لما نرضى بحياتنا
ياه وقلوبنا فاتحينها لخلق الله