عصفورة حكتلي إنها في يوم عدت من جنب غرزة
فوجئت بإن الله والرسل والوجود أغلب ما يذكر
شافت من كل سن كل شكل واللي رابطهم
جايين ينسوا الحياة اللي شيلتهم فوق طاقتهم
وقالتلي إنها اِتفاجئت في المدرسة بإن التلاميذ
جايين لكل غرض تتخيله إلا التعليم
بس قالتلي في وسط السيرك شوفت طالب علم بجد
منتبه للشرح بيكتب ومالوش أي دعوة بحد
للأسف تاني مرة شافت الطالب ده بكت
كانت طايرة جنب قسم صدفة وفوجئت لما لقيت
ظابط بيكهرب الطالب ويقوله: "علشان تبقى
تكتب وطن بلا تعذيب كويس على تيشرتك"
وحكتلي إنها في يوم كانت على شجرة قدام باب
مستشفى شافت دكتور خارج من الإستقبال
وواحدة ماسكة فيه بتقوله: "أرجوك جوزي بيموت"
قالها: "وأنا مالي يا ستي، هدفعلك من جيبي فلوس؟"
صعب توصف الحياة في شكل معادلة فيزيائية
سيمفونية كل آله فيها تبانلك عشوائية
مفيش حال بيدوم والتغير مالوش قانون
لا الوحش بيفضل وحش ولا هدايته شيء مضمون
صعب توصف الحياة في شكل معادلة فيزيائية
سيمفونية كل آله فيها تبانلك عشوائية
مفيش حال بيدوم والتغير مالوش قانون
لا الوحش بيفضل وحش ولا هدايته شيء مضمون
العصفورة غابت عني يومين ورجعت بحكايات
منها إن واحد من مجموعة الغرزة مات
وواحد تاني فاق قال: "يا أخوانا كفاية نسيان"
بس دماغهم أعلى من أنها تستقبل الكلام
وفي شارع لقيت خلق بتهتف تسقط الداخلية
طارت ورا المظاهرة وعند القسم وقفت هي
لما لقيت كل واحد لابس ميري بيغيره
ويا ويل اللي كان بيعذب ناس وفي ناس حافظين منظره
أما الطالب اللي اتعذب فرد في مجموعة سلمية
الدرع اللي حمى القسم م الأعمال التخريبية
أول ما إتصاب برصاصة قالت: "هيموت من الإهمال"
استقبله طبيب حقيقي مخدش نفسه إلا لما فاق
طارت شافت ناس محتاجة تحس بالناس المحتاجة
شافت كتير ما أنكرش لكنها ما شافتش كل حاجة
سألتني عن نظام الكون قلتلها هما دول
كل فرد اختار لنفسه شيء اِختار لغيره مليون
صعب توصف الحياة في شكل معادلة فيزيائية
سيمفونية كل آله فيها تبانلك عشوائية
مفيش حال بيدوم والتغير مالوش قانون
لا الوحش بيفضل وحش ولا هدايته شيء مضمون
صعب توصف الحياة في شكل معادلة فيزيائية
سيمفونية كل آله فيها تبانلك عشوائية
مفيش حال بيدوم والتغير مالوش قانون
لا الوحش بيفضل وحش ولا هدايته شيء مضمون