Me soven quandèrem dròlles
Aimàvem plan de cojar
Dins lo cèl la trena fòla
Dels avions a viatjar
De los veire aital somiàvem
Als païses estrangièrs
Ara quand vesi lo regatge
Pensi als charters dels sens papièrs
O ia ia ò ie ie
Anem gojat bolèga te
O e ie ò ia ia
Nos daissarem pas plumar.
♪
Plan sovent nos amusàvem
A far d'avions de papièe
Als quatre vents los lançàvem
Eran los nòstres messagièrs
Cresiam que la patz eissemava
Coma la flor de l'irangèr
D'uèi ausissèm tronar tre l'alba
Lo fracàs dels bombardièrs.
♪
Jogàvem a la mercanda
Ambe de mofa e d'aurièr
Nòstra argent èra de lavanda
Totes recebiam parièr
Cresiam que sus la planeta
Totes aviam lo meteis pes
Ara vesèm créisser los deutes
Dels pòbles que n'an pas res.
♪
Corriam pertot per carrièiras
Tot lo sanclame del jorn
Aviam libertat entièira
Per jogar a rescondons
La vida èra a nòstre imatge
Un camp sens paret ni cledon
M'ara per baissar lo caumatge
Sacan los joves en preson.
♪
Un pauc pertot sus la tèrra
Fan mesprés de la dignitat
L'estat de drech es una quimèra
Rai de la legitimitat
Los pus grands donan l'exemple
Sens vergonha de tot latz
D'un vam te mastan de temples
D'un autre los tenon tombats.
♪
E caldriá pas sortir de l'ombra
Totjorn demorar plan siaudet
Caldriá daissar anar lo monde
Que moriga daspasset
Sus nòstra bola terrestra
I a mai d'una umanitat
I a los que tenon lo cabestre
Que bailejan sens pietat.
♪
E i a los que se trigossan
Que se plègan sens quitar
E la massa silenciosa
Que totjorn seguís lo la
Puèi i a los que se revòltan
Que refusan de sutar
Los que se daissan pas tòrcer
Que se daissan pas dondar
♪
A tu de causir ta dralha
Lo vial ont vòls arpejar
Finta per delà las muralhas
L'asuèlh que vòls agantar
I a pas de vida sens luta
Cap d'accions sens s'engatjar
La sola batèsta perduda
Es la qu'as pas vogut menar.