Nur so am Rand
Hallo! Bitte spring nid grad weg!
Los mer fairerwiis schnell zua, i stecka viel in dä Track!
Au wenn Reims nüüt ändren, für mi häns zumindescht an Zweck
Und i mach kaina uf: "He, luag mol, miar gohts immer no schlächt
Obwohl Kollega scho mol finden: "Rennie, lach mol as biz!
Klar, irgendwenn werdi zu diar säga: "Mach doch was t wittsch!
Jo, soviil Realischt bin i – und doch, das Liad isch für di
Au wenn i textlich eh versäg, zumindescht liabi dr Beat
Denn kai Ziila würd diar grecht, kai Chance, i kriag das nid hii
Aber z Fühla und drüber z Schriiba isch jo schliasslich nid z gliich
Und viellicht tönts abdroscha und sisch chli spot, das no zsäga
Aber i dank diar für zwei wunderschöni Johr i miim Läba
Han hüt nüüt gmacht, nur Wetterbricht und Nochrichta gläsa
Israel baut wiiter Bockmischt und s chunnt am Obig go regna
I main, i bin zu nüüt meh fähig. T Uni schiisst mi nur a
Z Schaffa sowieso. Bin rächt froh, macht mer z Schriiba no Spass
Dia Wörter chömmen fascht scho vu allai, i schriib bis in t Nacht
I waiss nid – Intressiarts di? I han nur dr liislig Verdacht
Verstohn Truurigi, wenn's trinken, wills das liicht für aim macht
Au i han gsoffa und bin zweimol ufra Schiissi verwacht
Am nöchschta Tag han i di gseh und miar hän easy chli quatscht
Siit dua weiss i, dass es lang goh chönnt, bis i di verchraft
Bis i bhaupta chann, dass i di und diini Zwiifel jo raff
Doch he, mach diar um mi kai Sorga, will i das scho schaff!
Jo, für mi isch das do scho an rächt gwogta Versuach
Und wittsch nümm zualosa – druck uf Stopp! Du häsch t Chance no dazua
Doch wirf mer bitte nüüt vor. I mach das do, will i muass
Je meh dass t Ziit vergoht, desto meh verloht aim dr Muat
Und irgendwenn chunnt eh dr Fruscht und i lauf Gfohr, dass i fluach
Also nur no dia paar Ziila und i lohn di in Ruah!
Muasch sie au nid kommentiara. Das fändi aigentlich hohl
Falls doch, schriib mer a chüahls Mail, isch fascht am aifachschta so
Aber denn doch bitte ohni "Schöna Tag und bis dann!
Tönt so scho fascht so zynisch wia wenn t frogsch, wia nis han
Du chasch säga, du liabsch mi nümm. Bezüüchiga göhn halt zu Bruch
Doch gsehns mol so: Für mi bisch hüt dr zweitgröschti Verluscht
I bruuch kai Sorry. Mag nid mol meh an Grund, wos erklärt
Freu mi uf nöchscht Mol, wenn di gsehn, sind für mi bsundrigi Täg
Dussa würds scho langsam hell und miini Auga brennen
Nur no penna. Möglich, dass miar üs im Traum begegnen
Du bisch für mi dia Gröscht, was anders will das Liad nid säga
Wünsch dr nur z Bescht für t Zuakunft, Arbetsstell und Liabesläba
Enttüüschig isch, wenn sie verkraftisch. Und das nur so am Rand
Liabi isch, wemmas sött wohrha und mas trotzdem nid chann