Mamma mi dicia ch'eo duvia imparà
Par traccià mi la via in issu mondu chì và
Babbu in u so stentu par pudè ci ingrandà
Ci cacciava lu pientu à rombu di strazià
Eo vulia esse issu figliolu chì sà
Issu filu chì si tesse per ùn mai più strappà
Issu puntellu di casa ch'ùn cunnosce tremà
È issa lampara incesa in isse notte à scuntrà
Ripigliu 1
Mà, sò disoccupatu è ùn sò cio chì fà
Ni perdu ancu lu fiatu à rombu di cercà
Sò disoccupatu è ùn possu mancu dì
Chè ùn aghju studiatu per ghjunghja ne quì
Puru l'aghju pigliati issi chjassi d'imparà
I Bachi è li licenzii senza mai sfiatà
Per finisce Duttore d'una lingua chì và
Chì cura ciò ch'accorre ma ch'ùn si sà curà
Pienghju quelli chì ùn anu mancu pussutu fà
Issi tre o quatru passi à l'università
Chì sè à li tempi d'oghji ùn mi ponu ghjuvà
A cunniscenza sola porta a libertà
Ripigliu 2
Mà sò disoccupatu è chì ci possu fà
Chì l'aviu pigliata a strada di l'andà
Oghje u soldu travaglia bisognu ùn hà di mè
S'ellu ferma una paglia forse sarà per tè
Ripigliu 3
Sò disoccupatu ma vogliu fà scambià
Issu mondu chì si more di pocu sunnià
È saraghju occupatu puru per pudè dì
Ch'ùn aghju addisperatu issu mondu à custruì
È saraghju impegnatu puru per custruì
Issu mondu sunniatu per la ghjente di quì