-- مقدمة وصف لحال الكون بعد الدفن وقبل القيامة --
وشديدة الريح والمجدلية جارية في وادي فسيح
لا خايفة. ولا خطوة لقدام شايفة
معصورة في قلب جريح
ودموع وآلام واشجان وحنوط واكفان
ولا قادرة تصدق انو صحيح
والموت كان موت قاسي صريح
والضلمة عميقة وسوادها عنيف
واشباح اشجار حفيفها مخيف
لا حس حياة ولا حتى في ديب بيصيح
وحداد طبيعة رهيب. كئيب
والكون مفروش عليه احزان
ولا شمس حتى راضية تبان
طول ما الرب في قلب القبر طريح
وتهدى الريح. ويملى الكون جو لطيف
ومانسمع غير انفاس لهتانة.
ودقة قلب رهيب بيعلن حبه لكل الناس. وبسره يبيح
وغمام ينزاح. واحلا صباح ليك وليّ
ويظهر للمجدلية. ويهديها احلا بشارة تفاريح
وملايكا بتملا اركان الدنيا تفاريح
-- نهاية المقدمة --
*الهي حي... مش بين الاموات
يحي موتي... ويسند ضعفي
ويرفعني فوق كل اليأس... فوق كل اليأس
داه شايف فيّ انا... جبار البأس
الهي حي...
*مريمات باكيات... مريمات باكيات
*بكينا ع الحبيب... اللي مات بالصليب
وكان الموت... جزاء حبه لينا
ده كان وسطينا... يشفي ويحينا
وكلامه كان نور... يسطع ويهدينا
لكنه مات... الغالي مات
رب الوجود... واهب الحياة
وقمنا يوم الحد بدري... نجري على القبر نجري
للي قدم لينا نفسه بالموت
رحنا نكرم جسده بالحنوط
*وسمعنا صوت
*مش وسط الموت... ح تلاقو يسوع... ده حي وبيحي القلوب
*الهي حي... مش بين الاموات
يحي موتي... ويسند ضعفي
ويرفعني فوق كل اليأس... فوق كل اليأس
داه شايف فيّ انا جبار البأس
الهي حي...
-- كلام الرب لبطرس --
بطرس. بطرس انا بنديك
ما هي كثر الاحزان ولا كثر البكا يجديك
قوم ده اليأس شيطان يمنع. يقفل. يبني جو القلب حيطان.
تعمي الشوف وجدارها سميك
قوم يلا ياتلميذ.
تكذب. تهرب. تنكر. لسه برضوا عزيز
انت ضعيف... نعمتي تكفيك
روح دور ع الضايعين. دول ياماكثير. دول بالملاين
روح ده كل لحظةتفوت. نفس في ايد ابليس بتموت
والحزن عليها يملا قلب فاديها
روح... روح ارعى خرافي
والامر داه ليك.
-- ترنيمة بطرس --
*خاين انا... انكرت الحبيب
من بعد حبه... وكلامه العجيب
*وبكيت بدمعي... وطلبت الغفران
ولقيت سيدي... على الصليب يتهان
وده كلو علشاني
صلبه علشاني
موتو علشاني
*وجات المريمات. تقولي علي مات
انو حقيقي... مش بين الاموات
*من بعد صرخة... بيها انكرتوا
يسامحني... ويرجعني لحضنه
وعلى الصخرة دي يبني كنيستو
على حبي وايماني بوعده
-- الكل يرنم --
*الهي حي... مش بين الاموات
يحي موتي... ويسند ضعفي
ويرفعني فوق كل اليأس. .فوق كل اليأس
داه شايف فيّ انا... جبار البأس