حاليا بالأسواق كدب وغش وغدر وقسوه وفيه أزمه أخلاق
حاليا بالأسواق ناس يكفينا الشر بتجرى تقطع فى الأرزاق
والإحساس مبقاش له قيمه والإخلاص بقى موضه قديمه
وولاد تسعه للشر بتسعى، وولاد تسعه للشر بتسعى
ولفين رايحين محناش عارفين، ضايعين، تايهين، مجاريح، مساكين
عايشين ومش عايشين وجراح تجر جراح قوليلنا يا دنيا فين الدوا
عالم رايحه وعالم جايه وعالم تايهة فى وسط السوق
ونفوس والله ضايعة وضاله، ناس حريفة أكل حقوق
عالم رايحه وعالم جايه وعالم تايهة فى وسط السوق
ونفوس والله ضايعة وضاله، ناس حريفة أكل حقوق
اللى يحبك علشان عله واللى كأنه ماسكلك زله
واللى بيغدر ويا ساتر استر لو كان رزقك على مخلوق
ولا الصاحب اللى ملوش لازمه اللى يسيبك وقت الأزمه
مهما إتهرب بكرة يجرب ما هو من نفس الكاس هيدوق
غيرة وجرح وظلم يا دنيا ده اللى فى الأسواق
ناس بتخونك وتزيد جرحك وبتفتحلك جرح قديم
وتخون عيشك وتخون ملحك وأنت معاهم كنت كريم
ناس بتخونك وتزيد جرحك وبتفتحلك جرح قديم
وتخون عيشك وتخون ملحك وأنت معاهم كنت كريم
كنت فاكرهم والله ملايكه لكن دول طلعوا مع الرايجه
يخطفوا حبك وتلاقى قلبك مبقاش فيه ولا جزء سليم
تدى حنان يترد قساوة تعمل خير يترد عداوه
ناس مش هما زي الغمه منهم يا رحمن يا رحيم
غيرة وجرح وظلم يا دنيا ده اللى فى الأسواق
ناس مخنوقه وناس متضايقه وناس مش طايقه لبعض كلام
ناس مرتاحه وفايقه ورايقه، ناس تتحايل عالأيام
ناس مخنوقه وناس متضايقه وناس مش طايقه لبعض كلام
ناس مرتاحه وفايقه ورايقه، ناس تتحايل عالأيام
ناس جواها الشر بيرعى خلوا الحب مجرد سلعه
عايز حب وشوق وموده ممكن بس هتدفع كام
حتى الحب خلاص راح زمنه بقى ليه سعر وكله بتمنه
تدفع أكتر تتحب أكتر والمسأله مش عايزة علام
غيرة وجرح وظلم يا دنيا ده اللى فى الأسواق
خلق بتسرق عمرك سرقه وعلى القسوه ميتوصوش
خير تعمل شر تلقى، ناس بصراحه ميستهلوش
خلق بتسرق عمرك سرقه وعلى القسوه ميتوصوش
خير تعمل شر تلقى، ناس بصراحه ميستهلوش
يخدوا حنانك ويزيدوا همك، عايزين بس يمصوا فى دمك
تفضل تدى وتدى وتدى يفضلوا ياخدوا ومبيدوش
يدخلوا بيتك يكشفوا سترك يطلعوا برا يجيبوا في سيرتك
ضهرك ضهرك وشك وشك دول عالسر ميتأمنوش
غيرة وجرح وظلم يا دنيا ده اللى فى الأسواق
إحنا يا دنيا تعبنا يا دنيا وإتعذبنا شهور وسنين
ياما عاشرنا وعيشنا وشوفنا بنى آدمين مش بنى آدمين
إحنا يا دنيا تعبنا يا دنيا وإتعذبنا شهور وسنين
ياما عاشرنا وعيشنا وشوفنا بنى آدمين مش بنى آدمين
شوفنا اللى بيتباهى فى جهله واللى ملوش خير حتى في أهله
واللى بيحرم نفسه يا دنيا علشان يسعد ناس تانيين
واللى محدش ابداً هامه واللى بينكر لحمه ودمه
واللى مزعل فيه أبوه وأمه وعليه غضبوا ليوم الدين
غيرة وجرح وظلم يا دنيا ده اللى فى الأسواق