En onsrer Gegend gibt's an alda Brauch
Ma braucht bloss Lensa ond an grauchta Bauch
A Hand voll Mehl, Schmalz, Essig, gscheide Oier
Des gibt was guats, ond isch au gar net deier
An Hafa Wasser schdellsch jetzt auf da Herd
No nemmsch dei Lensa grad so wia sich ghört
Leers samt am Pfeffer ond dem grauchta Bauch ens Wasser nei
'S gibt Leut dia woichat 'd Lensa vorher ei
Dess isch net nötig weil sonst gibt's an Brei
Ma lupft bloss ab ond zua da Deggel
Weil wenns Wasser weg isch bisch dr Seggel
Nemm jetzt des Mehl ond hau fünf Oier nei
A Händle Grias ond Muskat, no wirds fei
No schlechsch den Doig mit'm Leffel so lang bis er Blosa schmeisst
Heut wirds guat, denn I koch mir was Feins, weil I morga am Fenfe verreis
I ess en Rom Spaghetti gern, oder Rösti dann en Bern
Nach London nemm I mir Bixa mit
Ma ísst Gulasch mit Knödel en Wien, oder Döner mit Soß en Berlin
Ond en Moskau iss I Borschtsch, obgleich er noch unerforschtsch
Doch bei Lensa komm I schier drübernei
Schdell dann dei Schpatzawasser no
Weil jetzt got's los ond nocher denksch net dro
Em dritta Hafa machsch dei Schmalz hois
A anders Fett got au weil manchmol hosch kois
Jetzt duasch des Mehl nei ond glei riachts ganz fei
No rührsch mim Besa weil sonst brennts dr nei
Sobald des braun wird leersch no schöpferweis dia Lensa drauf
Noch onsrer Meinong ghörat Schpätzla gschabt
Doch isch net jeder handwerklich begabt
Für solche Leut gibt's Drugger oder Hobel
Doch so a handg'schabts Schpätzle isch halt nobel
Mit Gwürz ond Essig schmecksch des Ganze ab
Jetzt kommt d' Belohnung für dia ganza Plog
Hock an da Tisch ond fang ganz konzentriert zom Essa o
So a Essa des isch halt a Gnad oifach guat ond ma braucht koin Salat
Hosch ganz Hongrige drbei, duasch no Soitawirschdla nei
Pro Person jeweils ois odr zwoi, odr drei odr viar
Morga mach I an Boga om d' Wog, weil I Lensa & Schpätzla so mog
Au mei Deller isch scho leer gib den Hafa nomol her
Ja bei Lensa komm I schier drübernei
Ja bei Lensa komm I schier drübernei
Ja bei Lensa komm I schier drübernei