كاتاستروف
هو شعار هاذ الزمان
او قالها النبي الحديفة بن اليمان
رايحة تكثر الآلام وتنقص فيه الامال
ويتخلط هاذ المكان بين الكفر والإيمان
أنعم هاد الكلام كان وحي منزل
يفسر أزمة مجتمع مسكين قاعد يتفسد
تفسد الوصايا لي وصلهالنا الرسول
عادو كل بالنفاق تع عبد الله بن سنون
والله ستُسألون عند المالك
شعب بالفقر و بالجهل ولا هالك
جيل ولا هايم فالشهوات او هامل
ومسؤول هاني في جوفه قلب هامد
يعني نقولهالك: والله دركا
عدنا عايشين في حياة شبه بنكة
أصحاب الخير مدرقكة
من الخوف راهي مدركة
والناس تع الشر ام واجدين في كل عركة
الفتنة لي راهي طلع هنا في دزاير
تفكرني في علي وقت طلحة و الزبير
مام تكون السيد والإسلام كي يكون زايد
كي بليس يتسيب والله الدم يولي سايل
الظلم يولي سائد ويكثر كي الجراثيم
والناس بأعمالهم يوليو كلهم مشرارين
بارتو منتشرين يمشيو كي الشياطين
يجريو مجرى الدم في العروق والشرايين
كاتاستروف
خاطاك الدعوة ولات كارثة
خاطاك المبيقات فهاذ الزمان اي ولات كاثرة
اي كذبة خويا صدقني راي مشها كذبة
كون طلع راسك تلقى علاماتها مقابلة وكابرة
كيما الطوفان راهي مقربة مخربة
تقتل زي الامراض لي جامي تبرأ
ضربة شاعلة في كل دار في كل بلدة
واحد ما يمنع الناس كل تولي هالكة
كاتاستروف هو عنوان الخطاب
خطاك ماكانش كلام لي يوصف هاذ الخراب
الخليفة بن الخطاب قراها بالكتاب
حيجيوكم ذئاب بملابس تع عباد
يجروا عالبلاد ويخلقوا أزمات
يهملوا الدروس تع الفتح والغزوات
يضيعوا الصلوات ، الصيام والزكاة
وفقه الأخلاق يغبروه في الخزانات
ويكثروا الزنات وتظهر الدعارة
أماكن تع الفسق تعود منتشرة في كل حارة
الجنس يدير حالة ويحطم الشباب
في المدن ، في الشركات ، في الليسي والجامعات
تتفجر العاهات النفسية والحسية
بين ليزوكسيدي والمقيوسين بداء السيدا
زيدها إصابات هنايا بالأعصاب
تصنع دي بسيكوبات تع فيول وإغتصاب
الشعب يعود مصاب عايش في خطورات
أولاده دايما تايهة وهاملة في الخطوات
يديروا غلطات تخوض غير بالتخلاط
والجيل كامل يغرق بالخمر والمخدرات وخباط
راح تتفلق الجرائم كل يوم عناوين في الصحف والجرائد
نشوفو غرائب بالموس الناس مذبوحة
النساء راي مسفوحة وأطفال صغار مذبوحة
كاتاستروف
خاطاك الدعوة ولات كارثة
خاطاك المبيقات فهاذ الزمان اي ولات كاثرة
اي كذبة خويا صدقني راي مشها كذبة
كون طلع راسك تلقى علاماتها مقابلة وكابرة
كيما الطوفان راهي مقربة مخربة
تقتل زي الامراض لي جامي تبرأ
ضربة شاعلة في كل دار في كل بلدة
واحد ما يمنع الناس كل تولي هالكة
كاتاستروف
المجتمع خبيث ، حقد كبير والبغض فيها غليظ
عمبالي راي تغيض كي يقلك الحديث
الإسلام رايح يرجع كيما بدا غريب
يرجع وحيد وفي الديار يعود مخزون
كيما وقت قريش وقبيلة بني مخزوم
اليوم ام وسخوه بالبدع نحاولوا أصله
وكاين لي صعبوه وعقدوه حتان تعصبوا
عديك وصلوا بزاف الوالدين
يخافوا عولدهم كي يبدا يروح للدين
يخوفوا لا يديوه عباد بالتشويش
يقولولوا باباك كافر لأنه ما يصليش
علاديك ناس تهيج وتهرب من العقيدة
تبانلها ثقيلة وعندها عقلية قديمة
تروح هاذ القيمة والدين يعود عادات
يعني كل المعاناة راح تتحملها العائلات
ضرب ، اعتداءات ، عنف وطلاق
أطفال صغار رايحة ترمى كل في الزقاق
تتربى في النطاق تع لادروغ ودير أنكونس
وتطلعلك سوسييتي تكون متعطشة لافيولونص
يُفقد الأمل والأرواح بدون ثمن
ورايحة تكثر السرقة بحجة قلة العمل
رايح يشرب الخمر لأنه يربع البدن
ورايح يكون الانتحار لأنه يفاجي عالملل
كاتاستروف
خاطاك الدعوة ولات كارثة
خاطاك المبيقات فهاذ الزمان اي ولات كاثرة
اي كذبة خويا صدقني راي مشها كذبة
كون طلع راسك تلقى علاماتها مقابلة وكابرة
كيما الطوفان راهي مقربة مخربة
تقتل زي الامراض لي جامي تبرأ
ضربة شاعلة في كل دار في كل بلدة
واحد ما يمنع الناس كل تولي هالكة