Cara 'e Luna
Comente dias esser cara 'e luna
In su tempus chi fis un'ajanedda
Si finas oje in die as sa fortuna
De parrer de atunzu una meledda!
Fis che reina, mancari viuda
Cun sos ogros infustos de lentore
Deo, supra sas nues de sa duda
In chirca 'e abrandare su dolore
Sos fizos chi connoschen s'orfania
Sun comente sos fenos in s'istiu
Che fiores in tempus de traschia
Trazados dae s'unda 'e unu riu
Che fozas a su 'entu 'e tramuntana
Amus lassadu sa domo 'e su coro
Dae tando as tancadu sa ventana
Fin'a su sole cun sos rajos d'oro
Saludende m'as nadu: in ora 'ona
Fizu meu, ti siat sa partèntzia
Sa bona sorte ti fethat corona
Comente chi mi tenzas a presèntzia
Tue as mantesu mudu su dolore
Pro su triballu meu in terra anzena
Ma deo apo connotu s'istriore
Chi t'at fascadu tota sa carena
Mama 'e sabiduria antiga e jara
Chi como ses a prope a sa 'etzesa
Totu su chi non t'apo nadu in cara
Ti lu so cunfidende in segretesa
Saludende m'as nadu: in ora 'ona
Fizu meu, ti siat sa partèntzia
Sa bona sorte ti fethat corona
Comente chi mi tenzas a presèntzia