ياو
وحدي في بيت ظلام
شمعة ورقة وستيلو
نداوي روحي بالراب لي ماعنديش غيرو
حروف ومعاني كي شواطن على الورقة تتجسد
ربي سامحني عصيتك جيت في مجتمع يفسد
في مجتمع يغلط يوخر في بالو قدم
كل شي تبنى وعلاه كان الدين لتهدم
صدر وفخذ يخدم و ديبلومات ما تفيد
كي الضبع إستغنى عبى جيوبو ركع قدامو الصيد
أحرار وألا عبيد الكلها تحب تورق
الحر بفيزة والعبيد يمشي في شقف يحرق
في الليل يشق الموجة يحكي همو للحوت
والموجة تولي دموع كيف يرجع في تابوب
كيف يرجع بلا صوت يرجع جثة بلا روح
يطلع الوزير في تلفاز يحكي عالطموح
العدالة كي السراب المستقبل عالأطلال
وعلم يرفرف في بلاد لمخذاتش الإستقلال
نجوم كان جات تتكلم توا تحكي ألف قصة
الحيوط كان جات تحس توا تطرشق تبكي بالغصة
ريوس من الهم شابت
العروق مالزرارق ذابت
تغيضني كي نشوف الوجوه الصفرة تموت قبل ما تابت
تغيضني كي نشوف زناقي يدعثر فيها الشاقي
مد فلوسو باش يشري بلاد ڤدمتوا فالباقي
قدرو معادش لاقي
دولة نكحتو بلا واقي
حب ينسى الذل والهم لقى الشيطان للخمر ساقي
لقى الثنية ما توصل أما الطريق ينسي
المهم ينسى الوجيعة خلي وين ترصي ترصي
خاطر الوجيعة تطيح les détails لفيها تكسر
حتى كان قلبك خبى الخزرة في عينيك تفسر
تحكي تفاصيل وتكتب في قصة بلا حبار
حزينة كيف قطرات المطر لهابطة عالبلار
يمكن السماء حست بيك والغيوم بكات
بقطرات المطر لطفي النار لإسمها ذكريات
حتى المفرادات كي جوانح لتقصت
تولي شخصيات تفكرك في حاجات تحست
كل كلمة عندها معنى كل حرف يمثل إنسان
تولي تحب تبيع كل ما تملك باش تشري النسيان
تفسخ برشة عباد وتجيب عباد جدد
وتقطع تصاور كان تتفرج فيها اليوم ترد
ولي كنت ملبسو تاج ومسكنو في قصر
تدفنو في الزبلة خاطر برشة عليه قبر
شد قاموس حياتك فسخ منو الحب
خاطر القلوب كي الصحراء لفيها مطر تصب
لتقراه في الكتب قصص من الخيال
جوليات كان جات في تونس روميو يشريها بالمال
خاطر كل شي بسومو شي ما قعد بلاش
ما فما شي في هالبلاد قعد ما يتشراش
جرب خرج لفة وأبدا في الطقوس
تو تلقى لتوفى يحي بالفلوس
دم أكحل منزوس يجري في العروق
يقطر عالأكتاف المايلة لهزها الصندوق
الورثة ما يهمهاش حلال ولا حرام مسروق
خاطر في بلادنا كان بفلوسك تو تتحط الفوق
أقعد إنتي مخنوق تحت ساقين لوطا
حي وما تكسب شي دولة تقيدك مع الموتى
الناس لتحكم بجعالة في بلايصها محطوطة
كي تضيع pénalty بفلوسك تعاود الشوطة
خاطر لعزف النوتة بناها عالنشاز
صنع أجيال مكبوتة تكحل عالتلفاز
بالشيخة مصموطة مخاخ على عكاز
وإنتي بيناتهم كي الحفيان ليمشي عالڤزاز
تحب تنسى الوجيعة أما مخك يتفكر
ما يجي قدك حتى masque وقت لتحب تتنكر
ضايع ما بين صفحات واقف في نص رواية
وأخيب إنسان تشوفو وقت لتثبت في المرايا
خاطر في بلاصة الوجه تشوف نقطة إستفهام
عبارة قصة تروي فيها أما من غير كلام
تعبر بالحركات يحرك فيك الخوف
وتسمع في تصفيق أما جمهور مكفوف
لي عالدنيا ملهوف ما يفهمش المقصود
مخو غابة فيها غزالة تحكم في الأسود
كل شي مقلوب حتى نارو تطفى بالوقود
ولي عاش عبيد في عيد ميلادو ناس تهديلو قيود
مش كل شي موجود
فما وجد خلق فما كيان لكلو شر يبعدنا عالحق
وأحنا بيناتهم الزوز عايشين في صراع
تعدي حياتك تلوج باش توصل لمن يطاع
تعدي حياتك متاهة كل شي يلعب بيك
إنتي تخلي ليحبك ولتحبو يخليك
طريقك كي سراب مسطر كحلة فيه نجوم
بقطرات دم أكحل لا تقدر هابطة من الغيوم
تنزف كيما جرح قديم محبش يتلم
باش تنسى الوجيعة متاعو تغرق في العدم
بلا نقطة إرتكاز تطير في الفراغ تعوم
كي سبات ليبلع فيك ومتنجمش تقوم
هذاكا علاش النوم كيما الشيخة يكلميك
كل شي يتفسخ يختفي كي تغمض عينيك
تتلاشى من الوجود تمشي لبعد جديد
أما كي تغرق فيه حتى رجوع معادش يفيد
خاطر لو كان ترجع تلقاه الكل دمار
كل شي تلقاه مهدم كياسات وديار
الورد لخليتو ذبل وحتى الحمام طار
والحيوط المقشرة مكتوبة بالأسرار
فيها معادلات وإنتي فيهم عدد
يا تشد في يدك سيف يا دمعة هبطتلك عالخد
ما ياقف معاك حد وحدك تشق الصفوف
وأبعد عالصنم طحين لي ناس بيه تطوف
وقت لتأكل لكفوف تعلمك الحياة
بلي العباد لدايرين بيك الكلهم أموات
دم يجري في عروقهم أما قلوبهم ما تحس
جثث تمشي عالأرض تعرف كان تفترس
كي باش تستنا شكون يجي يعمل معاك الخير
عبارة تمساح خرج من الماء تستنا فيه يطير
ولا تستنا في أيات يقراها صنم
ولا رابورات توانسة ولى عندها قلم
يقتل فيك الندم وأنت مطيش مريض
يراك فوق القمم وأنت في الحضيض
تكتب في الحكم دولة تشوفو تحريض
كلامك درجات بين الوحي والنقيض
كلامك مكتوب بلغة تفهمها كان القلوب
العروق لي بالسم ملدوغة مش فروخ اليوتوب
ليسمع بوذنو يضيع يلقى المعنى فات
باش تفهم غمض عينيك وأغطس في المفرادات
تعلم أسمع الصمت قبل ما تسمع الصوت
تو تفهم للموت هي الحياة والحياة هي الموت
حتى كان عجبك الديكور لي في المعرض محطوط
الروح عمرها لا تجري في تمثال منحوت
ما بين ربعة حيوط في بيتك تتفرج
قاعد تشوف في تلافز والبرامج فاش تخرج
كل مرة يطلع مهرج يحكي بأسم الفن
كل مرة رئيس جديد يبيع الوطن
سرقوا منا الألوان وبناو واقع ظلام
دڨ السم في العرق الواقع يولي منام
دوزة تكلمي البدن تخلي المخ مفسخ
وخطوة للكفن بالدم لي في العرق مسخ
في ريوسنا يترسخ لتعلمناه صغار
كي كبرنا طلعنا جيل ضايع ربانا الإستعمار
شعب بلا هوية طموحو فيزا ومطار
بلاد عندها سيادة أما معندهاش قرار
Les Identité متاعك محصورة في Fichier Excel
مخك في Télévision مرهون في بيكسال
كي تبلعك لécran تأثر عليك ليزونت
تولي رقم من الأرقام لي في télécommande
Valeur متاعك ولات نوامر على Instagram
حتى الفن والإبداع يتقيم بالأرقام
جيل كي الماكينات صنع في تيك توك لكلهم كي روبوات لي محطوطين في ستوك
نفس الفورماتاج كل واحد Matricule
ركبولهم Des Processeurs في بلاصة Les cellules
Puce في راسو تمشي فيه مش خلايا في الدم
بحياتو يكتبها Gomme وموتوا يفسخ فيه قلم
Braquage في بلاد الهم ويموت بسكينة
ڤومة تبلع البراءة وتموت المسكينة القلوب صحيح حزينة أما المخاخ فرحانة
مخاخ تتحيل وتصفق لدولة كي طحانة
دولة لتنهب ورئيسها لي في الكذب بارع ما زعيمة كان تهبط في الليل تقتل في كلاب الشارع
في بلاصة الجهل تفارع تحارب في العقول
عاملة compétition لمبن شكون يجي لول
شركات وحقول أما النفط مفقود حاول حل دوسيات تتسلسل بالقيود
كرطوشة بكاتم الصوت قدام باب دارك
ماهيش قوة إستخبارات لي حشاهالك جارك
ساعات يوفى نهاراك بوليس في زنقة ببطرة دولة لتسربيلك ومباعد تشدك عالزطلة
عباد تعيش عالنطرة جيب العط باش تشيخ
بطاقة تعريف في تونس أما سكنة في مريخ دور صواريخ وطير بين الكواكب
يا تموت بدوزة زايدة ولا في موج بين المراكب
دور صواريخ وأطلع طير للڤمرة
يمكن كي تطير تنسى بلادك لتحرق كي الجمرة
عينين محوقة حمراء مطيشة في سبيطارات قداش من بطال في bureau يخدم في الإدارات
مطارنا محطة متاع لواج قدام المطارات
أما هوما لاهين بأكا الفنانة لعرات بلاد عالأغلاط جات بنات العرص
هذاكا علاش كل شي غلاء كان شعب لرخص
كيما البرغوث ليمص الدولة تمصلك دمك غلاو Les Taxes قريب تولي تخلص على همك
كل شي يمشي بالرشوة في بلاد القانون
ما يهمش CV قد ما يهم لون الكلصون
الصحافة إشاعة والفن ولى مجون وذكورة تتكريك تتلعوك كي المعجون
في بالك تدور حر وإنتي في بلادك مسجون
خايبة كي فلوسك تاقف معاك أما الصحة تخون
شعب يصرف أكثر ملي يخلص غارق في الديون ولي قرا درجين في ڤوڤل تخرج أفلاطون
لكلها تفهم في كل شي أما كل شي غالط
كي البو ليتبع عالفساد ما يحبش ولدو يخالط
فيبالو كي يجرب يفهم أكثر من طبيب كيما لحط لحم على ثلج يستناه يطيب
برشة أكاذيب مبنية عليها حياتنا
خايفين من مستقبل لجاي ونادمين على لفاتنا حتى تاريخ وفاتنا حنا كتبناه بيدينا
كي رضينا نعيشوا في بلاد كي خفرة لتبلع فينا
كل لحظة تو تعدا تعذبنا وتنقص من الروح
قعدت كان ريحة قوم لوط لطالعة وتفوح لازمنا فيضانات تهزنا بلا سفينة نوح
البلاد الوحيدة لرشوة تشري طموح
وما يداوي مجروح سيف عالرقبة تسلط
ما تشبع جواعة بنوك جديدة تحلت
قبور بالدموع تبلت وبالقهر تسقات
القبر يقعد قبر حتى تبنيه بالمليارات
لو كان تليقو بالديامون وتدهنو بالذهب
في الملئ الأعلى لفوق كان بأفعالك تتحب
غادي المادة ما تفيد الذنوب ما تجيب رزن
غديكا ما يفيدكش الgucci لمزين لكفن
تعب وطاح البدن وجرى بينا العمر تعلمنا وما طبقنا دروس لين شيب ظهر
لين ضحكة مشات وجوه غالية تنسات وأنت تحاول باش تبدا حياتك لين تلقاها وفات
نار في كلمات والستيلو بنزين
العباد تسأل علاش نرابي بكلام حزين خاطر من عهد الزين شي ما تبدل لتوا
خاطر لعندو سلطة مزال يحكم فيك بالقوة مواطن حد ما عندو تتعدا عليه القضاة
الدولة مريضة بالكلب قداش كلينا عضات عاود كيما المحفوظات تاع قبل فل école
المساواة كذب والعدالة décor
تشش تعري ال Corps وتخدم بالبزول والدولة تقلك أصبر البطالة شدة وتزول
شد أدهن بالمفتول وأقعد للقانون مطبس كي على جنب تحب تجيب عطك تشد الحبس
بوتيكاتهم ما تلبس وحوايجها لتعري
البلاد سبورة كحلة ومدارس ما تقري توري أنتي نوري خمس لايت وكام
عباد فاتها train أما تجري وراء اللحام تاكسيست جلطام والclient لقبيح
المسرحية متاع كل يوم لي القدر فيها يطيح بوليس من غادي يصيح والعشرة هوني تخلص
الكل ترشق عليه تقول في حنة باش يعرس هذا قانون لا يدرس لا في ليسي لا لفاك
هذا قانون تتعلمو في شارع بالمتراك إمشي بركة حد ما راك قول في خدمة المواطن
بوليسية بالزي تنحي ال masque تلقى شواطن
عندك في العقل الباطن برشة تصاور وخبابل الناس بمخاخها تمشي وأنت ما بيناتهم هابل
الدم في عروقك ذابل والوقت كيما القاضي
حكم عليك بالموت والإعدام تنفذ في الماضي الحسرة والوجيعة تقعد ديما فيك تبع
حتى كان كرشك تتنفخ فلوس الحرام ما تشبع ملك الشر متربع في عرشو عالماء
يتفرج عالبشر كيفاش تسفك في الدماء ألاف الأبرياء قاعدة تموت في الحروب
وشيوخة الرياء تدعيلهم عاليوتيب إمام الحرم مؤمن أما جوع كافر
ليحل فمو بكلمة حق لزنزانة يسافر كل يوم ناس تموت فيروسات وأمراض
شركات كبيرة تاجر تصنع في الأمراض بشر من غير قيمة مهدد بالإنقراض
القيم تدفنت والحضارة ولت عالإتقاض فنانة إستعراض دول تعطيها قدر
نفس دول سكتت كي تسب سيد البشر الصدق في الفعل أما الكذب في القول
حكمنا ساكتين منهم في الفضلة تتسول كي ذكورة تتحول هذا إسمو تطور
هاذي إسمها الحضارة ليجي يصورها المصور
كي تلبس حجاب تولي العصور توخر قدامهم حقها يتهظم وما يجي حد يتدخل
والله عالم يبخل شنقوملو كل نهار تحل عينيك تلقى العباد تعبد في دولار
كي تخرج من دار عبارة دخلت المنفى دستور عندنا يحكم أما قوانين محرفة
إمشي سيربي العلفة في دوزة Politique
دول ديمقراطية قاعدة تنهب فل l'afrique
بيترول إينريوم
برا هز ما يهمش المهم عطونا دواء لكلاراز باش معادش تتكمش
لفلوس ما تتلمش
وبلبالة تتفرق
لحرام طغى ولحلال ليوم معادش يعرق
شد لبرة وزرق يمكن تنسى للضلم
نعيشو في جبانة لي يرفرف فوقها علم
يمكن الألم يتنحا بلكتيبة لوجوه لي والفت تسمعني ليوم وليت نشوفها غريبة
يمكن الدنيا صعيبة لزتني عالمر
تغيظني كي نشوف قلمي مزال مدفون بين الحفر
تغيظني كي نغرز للمرايا على ضوء الشمعة
نتمنى نرجع نحس نتمنى تهبط الدمعة
كي ماتت في عينها اللمعة إلي رجعتلي الحياة
بعدة وخلتني وحدي قاعد نموت في سكات
قعدت ذكريات تتعدى كيف الأشباح
نبيع إلي بقا من عمري باش نفسخها ونرتاح
كي نغمض عيني في راسي نسمع كان صوت صياح
أصعب عقاب نهار الجديد إلي نعيشو كل صباح
أصعب عقاب كي تبدأ حي وأنت كل شي فيك مات
يدك تعبت وال public يحب تكتبلو كلمات
في بالهم كي تشد القلم تكتب في العبر
وأنت مع كل حرف قاعد تحتضر
تموت مع كل معنى تتدفن مع كل بار
كل سطر مكتوب عبارة على إنتحار
رابي ب téléportation وقالك فاتك القطار
خسارة قلمك كاسح أما تسمع فيك أصفار
كيما المغروم بالرسم ربي عطاه نعمة
صور لوحة مزيانة ألوانها ما عجبتشي الأعمى
هكا كي تكتب معنى وصعيب باش يتفهم
عبارة طبيب شد مريض يداوي فيه بالسم
هذه قصة artiste معادش عارف روحو شكون
الوجيعة تحرك فيه ومخو هازو للجنون
Artiste تعب من كل شي معادش يحب يبان
وين جمهور كالطاعون يقتل الفنان
يقتل الأفكار يقتل الإبداع
معندوش حقك أما يحب رابك يتباع
ذوقو يغطي عالأفق ما يخليهوش يضئ
في بلاد قاعدة تقتل فينا بالموت البطيء