مازلت نعيش بنفس الحروف ندور في نفس الفقرة
نكتب في كلمات ونعطي للعمي تقرا
يدي تعبت والقلم مازال يحب يقول
حالف ما يرتاح كان ما يشوفني في قبري مسبول
نفس البياسا ونفس السواڨر المدورة
مع عباد قلوبها كحلة أما وجوها منورة
وجوها مفسخة بشيخة تقول بقلم رصاص مصورة
ڨزاز يحك في بدنو سكاكن والسهرية مطولة
نفس الشيخة ونفس الناس ونفس الطموح
نفس الحفرة لي نعيشو فاها مع وجوه اللوح
شيخة راهي تكالمي لبدن اما تقتل الروح
مخك لي يفكر يحكي مع مخ بالشيخة ممسوح
أعوذ بالله كلامي تقول سم
على مليون سطر كتبتو سطر واحد تفهم
أما لي فهمو كي سمع رابيرات اخرين ندم
خاتر فاق لي عدا حياتو كلها يسمع في الغرم
مانيش نكتب في شعر وكلامي موش بالحروف
كلامي ثقب اسود ظلام يضوي للمكفوف
حط الكيت وغمّض عينك تو تولي تشوف
السراب يولي سطر تقراه في كتاب عنوانو خوف
لي نعمل في ماهوش راب، كلامي ماهوش فن
كلامي سيروم لي يقوم الميت مالكفن
يرجع حي وانا في بلاسطو نمشي نتدفن
الانس ما فهماتنيش قريب نرابي للجن
لوجيعة تحطم الروح قبل ما توصل للبدن
كل مرة تتعدالك جرعة متاع سم في الحقن
تولي محطم اكثر مالوطن
كل مرة ايدونتسي ترجعك بعد ما تتدفن
تقعد ادور في نفس السيركل، في نفس الألم
بلا مكان ولا زمان، تتعذب في العدم
حتى لي عروقك تخرج تذبل ويشيح منها الدم
حتى لي العالم ينساك وانتي مرمي تحت ردم
نتمنى لي يسمعني يجي يعدي في راسي نهار
تو يتعذب في الجنة ويتنعم في النار
يتكوى بالثلج وتجمدو لي فلام نوار
تو يتدفن في القاعة ويبدا يحس في روحو طار
كان مجاشي حرام حياتي توفى بانتحار
نحاول نتنفس ونخرج بأقل الأضرار
قلبي راكع في مسجد ومخي يسكر في بار
كيف الاوطان بعد الحرب بدني من داخل دمار
ساعات الدنيا تلزك موش ديما انتي لي تختار
قلبي يسامح اما مخي يحب ياخو بالثار
مريض نحب فلوس مايداويني حتى سبيطار
خاتر في بلادنا كان لفلوس تعملك اعتبار
نعيشو في رقعة شطرنج وضعنا بين الاحجار
الشعوب ولات بضاعة والحكومة تجار
واحنا بقينا كيف الاوراق تدلدل كيف الاشجار
نهار باش نسمع تولطن مخي عمل انفجار
كان جا البيترول عروق في المخ راو بدني ولا بار
حتى ستيلو يعكش كل ما يجي يترجم الافكار
نرسكي بالبارولات تقول نهرّب في الاثار
ولي مهبط غناية بدقيقتين فيبالو عمل افار
ماناش كيف كيف كان انتي الموت انا راني قبر
مخي لازمو كوبا لكل انت مخك يشيخ بسطر
بدني لازمو فارماسي تتڨلع كي ترمي شطر
انتي ضو الشمعة يشويك وانا ندفى عالجمر
انتي سماك كتصب مطر زرقة صافية
سماية تقطر دم مغيمة ندعي ربي العافية
مڨحف ساقيك حافية ما تلعبشي مع المافية
تعدي حياتك لكلها كتيبة نجي نحطمك بقافية
بركان وكل مرة تبربشني شمعة طافية
خلاها على ربي وحدو لي يعلم الخافية
ما يداويني طبيب عندي دعيوة أمي شافية
ما ترتحنيش القصور قد الكتاف وليدين الدافية
والدنيا وافية أما الناس نسات يوم الحساب
ولات تتكالب عالدنيا حتى أكثر مالكلاب
نعيشو في عصر وين المادة تقيّم البشر
ونساو القصور الواسعة في الجبانة غدوة تولي حفر
الفقر ولا عيب والمظاهر ولات مرض
الناس ما تتهزش بمقص النار عليك تتفرض
كيف لكلاب عليك تنقض تخرّج فنيابها وتعض
هذاكا علاش وليت كي ندخل في حرب ماعاش تتفض
مخي موش كي قلبي مخي ما يعرفشي رحمة
مالوريد للوريد يذبح لعباد الي ڨلوبها مفحمة
ما تجيبهاشي صحبي وانتي تحكي زارع الغام
وليت ما نرقد ونبرد كان بالانتقام
تعلمت نعيش بوجه واحد بين ميات حرباية
خاتر كي نشوف في المراية يقعد كان خيالي معايا
نهارت لي تموت الناس لكل تجي لدارك تترحم
كي كنت حي لكلها تدعي و تتمنالك تموت مفحم
مع نفس لوجوه مازلت في نفس الدوامة ندور
ماعدش نقدر نتحمل نشوفهم طفيت النور
حتى تعطيني ذهب الدنيا تسكني في قصور
الضو في قلبي طفا ولا اظلم مالقبور
كاره لبلاد والعباد الوضع مانيش قابلو
مخك قاريه وبيراتيلو سيستامو الي صابو
فاهم علاش في ضهري تحب تلعباها بابلو
واتطبس راسك كالتشة وقت الي نتقابلو
فردك مشرجي طحين فارغ ما فيهش كرتوش
تعدي حياتك راماسير تجيب فالكور مالتوش
السيد كي يشوف ضبع ياكل في الجيفة ما يلوموش
هذاكا اصلو اما كي يجي تحت نيابو ما يرحموش
كاره كل شي نحب نخرج وتبلع فيا دوامة
دوامة يغرق فاها الراجل واللحاسة عوامة
ما عادش تحير كي تشوف بشر ليوم لابسين كمامة
في بلاد التفاهة والدولة لي تسربي في البهامة
والتحتية ولات ملابس ومعادش بنيا
في بلاد تركع فاها لكرايك تحكمها لحصنيا
حتى الفقير نسا لي خلقو مشا يركع للغنيا
بلاد تعلمنا نبيعو لاخرة بالحياة الدنيا
ليوم في بلاسة السكاكن ولات تجرح الالفاظ
نعيشو في مجتمع ميت تدفن تحت الانقاذ
ليوم الطبيب في بلاسة ليكشف عالأعراض
ولا هو لي يعديك هو يعديلك الامراض
الدنيا تتقلب ولعباد ما تتمنش
نعيش كان بالحلال خاتر لحرام ما يسمنش
حتى عايش شي ما عندي راو كلامهم ما يهمش
بالرغم لي عندي جروح كبيرة ما تتلمش
نعيش بسيكاتريس منها ما نبراش
خاتر في بلاصة الدم القلب فيه nbh
موش عارف الدنيا من بعدك كيفاش باش تتعاش
دويات الدنا الكل تتلمد ما تقوموش مالانعاش
فما كلام يتكتب وفما كلام يتحس
نموت كان نهار اخر يدك من غيري تتمس
كان جينا في تايم آوت نتبرعلك بآخر نفس
نعطيك لي بقا من عمري كان جات سنين من العمر تتقص
تتفكر كي نقول لي جاية وجيعة وقت لي تبدى مريضة
كنا في نفس لحلمة نعيشو صغار و قلوبنا بيضة
تعرفني نبات ما نرقدش وقت الي نبكيك
كنت تشوف الدنيا بعينايا و كنت نشوفها بعينيك
ربينا ولادنا حتى قبل ما يجيو
ما نسحقوشي كلام كنا بعينينا نحكيو
كنا نعيشو بلا حسابات ما بينتناشي ماسك
نحرق الدنيا على خاترك باش تعيش هازة راسك
تفكر كيفاش كنت نرضيك بأبسط الحاجات
نفرح وقت لي تتبسم وتقولي نسيت الي فات
كان فيبالك لي عشناه ولا ذكريات
لي عشتو معاك لكل مزال حي وعمرو ما مات
كنا حاجة ما تخلقتش كنا اكثر مالاصحاب
ونهار لي ما نشوفك فيه يتعدا عقاب
كيف تظلام انت كنت النجمة لي تعطيني النور
انتي كنت الحاجة لي مصبرتني عالدنيا لي ادور
من أول الدنيا معروفة كل وردة عندها شوك
نغطيك و يدي تنزف دم نخاف لا يعفسوك
كي يقص عليك لماء تعرف بعروقي نسقيك
كي تجي عاصفة قوية شتهزك نموت اما نغطيك
نعرف لي من داخل ما تحبنيش ننساك
ما توحشتكش خاتر في كل لحظة قاعد نراك
لي تحفر ما يتنساس أما هذاكا لي كتب
سيرتو لاكان تحفر في قلب عمرو عليك ما كذب
لازم ميات فيلسوف يحكي بميات لسان
باش يفسرلك كيفاش توصل تتنفس إنسان
خلي الدهر الكلو يتعدى والوقت يفوت
اسمك يقعد محفور في قلبي حتى بعد الموت
انتي تعرف لي يقتلني ولي يخليني نعيش
نعرف لي تسمع سكاتي وقي الي ما نحكيش
بالرغم لي النسر ما يطيرش بلاش جوانح و ريش
أما عمرك ما عاد تسمع منو كلمت ما تمشيش
ليوم قاعد وحدي نتفرج فيك من بعيد
الضربة لي ما تقتلش اتزيد تخليك صوليد
اللهب متاع النار يزيد يقوي لحديد
نكتبلك مليار سطر كان جيت نعرف كلامي يفيد
ليوم نقاوم باش نعيش نهار يتعدى سنين
في عالم بلا قوانين لوقت ولا رزين
حتى ستيلو ماعادش راضي يكتب كان كلام حزين
نمشي هايم موش داري موش عارف روحي وين
بقيت كان بالراب نعيش قعدلي كالدواء
كان موش هوا القلب ياقف تتجمد فيه الدماء
كي مشات هي قعد وحدو مصبرني عالبلاء
في عالم ظلام يضويلي كالنجمة في السماء
في عالم كيما الفناء بلا بداية ولا نهاية
كل قطعة في بدني كلمة معزوفة تحكي في رواية
والعباد لي دايرة بيا مظلمة كيما لغيوم في سماية
حتى وليت نخاف نغزر لروحي في المراية
خاتر كي نشوف فاها ماعادش عارف انا شكون
كي اتمثال تعبني الصمت وقتلني هذا السكون
في عالم لكلو اكحل وابيض ما فيهوشي لون
مخي تعب نحب حاجة تخرجني من هذا الجنون
أصعب وجيعة كي ماعاش تحس لوجيعة
من داخل مخك و قلبك يعيشو في قطيعة
ندعي ربي باش يعطيني صبر
يعطيني سبب نعيش علا جالو نخرج ماها القبر
في النهار نموت ميات مرة بلا جنازة ولا دفن
كي نحط لحوايج على بدني كايني نتكفن
كرهت كل شي موجود فوق لرض على خاترو معفن
موش عارف البشر كيفاش يرقد ويغمضلو جفن
ماعادش عندي القوة باش نكمل
ما عاد فما شي مزال يخليني نتحمل
أول مرة ستيلو يطيح من يدي و ما يكملش
نتمنى يجي نهار نفيق وعينيا ما تتحلش