نشوف في حياتي تعدّات، قدام عيني و مشات
لبدن معادش يحس يتأثر حتى القلب مات
الوجه ولى شاحب كيما الوردة إلي شاحت
الوردة إلي قلعوها من عروقها بش ارتاحت
نكتب في كلام ظلام مغلف بالأوهام
لبدن تعب، لعروق شاحت طيحتها ليّام
الوقت ولّى رزين والدقايق كاينها سوايع
عقارب المنقالة تدور وانتي في وسطهم ضايع
حياتك كي السمفونية المعزوفة بلحن حزين
تعزفها وإنتي مخنوق حتى مالنفس تحسو رزين
تحب تعرف إنتي وين، إنتي في اللاّ مكان
إنتي ورقة خريف طاحت، لعب بيها الزمان
لي يغيض مش طريقك إلي مافيهوش رجوع
أكثر حاجة تغيظ كي تجي تبكي وما تلقاش دموع
تلقى البدن موجوع، ماعدش عندك صوت
الدنيا تولي بلا طعم كاينك تمثال منحوت
العينين تذبل وتطيح، ماعادش تعرف النوم
حتى كي تهزك عينك تتمنى ماعادش تقوم
تتمنى ماعادش تشوف، تصويرتك البلا ألوان
تتمنى قلبك ياقف خاطر يدق كان أحزان
تتمنى ماعادش تبان وتغرق في النسيان
تتمنى تفيق مألكذبة إلي سماوها الإنسان
كل ما تجي توصف إلي تحسو ما تلقاش كلام
كل جواب تلقاه يزيدك نقطة إستفهام
بلا إرتكاز في الفراغ تحس روحك تدور
تحس روحك نقطة بلا حرف ضايعة بين السطور
تحس السطور تتركب تمشي في نفس السياق
قبل ما تركب المعنى تتبخر في الآفاق
تحس أفكارك تهرب منك، مخك ولى شارد
الدم تجمد في عروقك وبدنك ولى بارد
ماعادش عندك إحساس لا بالمكان لا بالوقت
تحس روحك بلا صوت كاينك عمرك ما نطقت
تبدا تتبخر وتذوب حتى تولّي عدم
الحاجة الوحيدة إلي تحسها غادي هي الندم
تذوب كالسراب وتخرج من الوجود
تتبخر، وحد ما يحس بالي إنتي مفقود
ضايع في المجهول، حد ما حاسس بيك
حد ما يحسب معاك الليالي إلي تبكيك
تشوف حياتك قدامك تذبل وتذوب كالشمعة
الشعلة إلي فيها تضوي تطفى مع آخر دمعة
تولي ماعادش ذات، تولي ذكريات
تصاور فاها برشا وجيعه و شوية ضحكات
تصاور فيها برشا وجوه كانت قريبة ليك
بدات تتلاشى مع الريح، بدات تمشي وتخليك
تحس يديك رزينة، كي تجي تمدها في الظلام
تحب تشد الوجوه تلقاهم سراب وأوهام
كل شي يتلاشى قدامك كل شي معاد يبان
الوجوه إلي تلوج عليها ضاعت وسط الدخان
تحس روحك كي الرماد إلي خلفتو النار
الدنيا تهزك و تجيبك الريح تنفخ عالغبار
محصور بين الحيوط حتى مالإحساس يموت
كل شي ساكن وجامد كاينو مفماش صوت
وراق حياتك ذبلت، شاحت، ولات جامدة
تشوف في الدنيا تتحرك وإنتي كي الجثة الهامدة
تحس الوقت واقف العباد تجري وإنتي بركا ساكن
قلبك بش ينفجر تصيح وهوما يشوفوك ساكت
غاديكا تفهم إلي في الدنيا معاد عندك شي
ما فمش حاجة في الدنيا تخليك بش تقعد حي
ماعادش فما أمل في غدوا ماعادش طموح
القلب حزين ما يحلمش كيف يبدا مجروح
في اللحظة هاذيكا تغزر للمرايا
تشوف تصاور حياتك تتعدى كيما الرواية
تحب تكتب النهاية يتكسر في يدك القلم
كيما تكسرت أحلامك، ماتت ودفنت تحت الردم
وقتها ترجع في يدك ورقة و قلم
في عصر الجهل وإنتي تحاول بش تكتب حكم
تحاول تكتب كلمات ليست كالكلمات
تكتب تاكست معبي يلخص معنى الحياة
تحاول تكتب تاكست يلخص معنى البشر
معاني تحكي عالصراع بين الخير والشر
تولي مجهول في عصر الجهل كيف تكتب عبر
لعباد لي حكاتو في ألبوم تحكيه إنتي في سطر
سطر فلو بش يتفهم لازمو برشا تفكير
لازمو قلب يحس و مخ بش تلقالو تفسير
كل كلمة عندها معنى، كل معنى عندو معاني
وذن تبع و تفهم وذن تسمع وتعاني
رابك كيف البحر في وسطو السؤالات تعوم
لي يغرق في المعاني ما يفهمش يبدا يلوم
رابي لابس غاز ماسك خاطر كلامهم مسموم
لعباد تشوفك مجهول و كلامك ماهوش مفهوم
هذاكا علاش الكلها قالت ساي قلمو وفى
القلم مازال يكتب أما البوبليك إلي إنتهى
اليوم الراب مرض وقعد كان قلمك دوا
كان هكى يموت القلم خليه مالا يمشي فداء
خليه مالا يتدفن مع ألورقة في قبر
قلمي مر وكان نقعد تو نكتب ما أمر
تهمة متاعو كلام رزين حكموه بالإعدام
حتى الراب كرهكم بدل إسمو بسيكو ام
حكمو عليه إعدام و التهمة راي برشا كتيبة
وين البوبليك يحب تيتر ما يفوتش تلاته دقايق
كي تحكي كلام رزين و موزون هوني تولي مصيبة
لعقول مخدرة دايخة وإنتي تحكي عالحقايق
ما بقاش الفايق، البوبليك يتبع كالقطيع
يخون و يغدر يتكلم و يحكي عالوفاء
رابك بلاش أما بخلافك الكل قاعدة تبيع
تيتروات عالشجاعة تكتبها الجبناء
أنا نكتب لي برول متاعي مش هي تكتبني
في تونس لعباد لي تكسر تسب في لعباد إلي تبني
وقت تسبني و وتقلي كلامك عمرو ما يعجبني
لا قلت لعباد تصفقلي ولا قلتلك حبني
كان ما تشوفش كلامي فور، خاطرو ميتافور
من أول نهار في الراب عرصة مش كيفهم ديكور
تحب كلام ملفق، أحنا كلامنا موزون
كلام ينقبلك مخك كيما طبقات الأوزون
أحنا رابنا ذهب في بلاد تحب الفالصو
كل ما يكون الفن تافه كل ما الدولة تخلصو
على قد طحينك قد ما تجيك لفلوس في ماصو
شكون مازال صادق و يكتب لكلام لي حاسو
تفكر في عصر الظلم قلمك كسر لقيود
بوبليك كان كاسح وكنت تشد لقلم فرحان
ليوم لقلم حزين خاطر الي كان ماعدش موجود
البوبليك نسى التاكست ومشا تبع الالحان
لي يغني درج في هالبلاد يولي عم الطيب
كلامي قوي يوصل وحدو ما يستحقش فايب
صوتهم بلا دي زإيفاي كيما وجهم خايب
الكروسة صحيح تعاون اما ما تقومش العايب
يقولولك رابك مات في بالهم الراب يتوب
يقولولك قلمك شاح كيما الشمعة قاعد يذوب
ما تجاوبهمش تعرف رابك محفور في القلوب
الشمس تغيب أمّا ما تطفاش بعد الغروب
خاطر بالوضع واعي، شا نفسر دونك؟ لا داعي
خسارة لعباد اليوم ماعادش تفهم لكلام متاعي
رابك ممنوع ما يتعداش في البث الإذاعي
كلامك مكروه في بلاد السم لي تنشر فيه لأفاعي
كل شي جبتو بذراعي مشيت على جمر و النار
كل واحد يعرف روحو وقت لي يغزر في الميروار
نقعد جبل مش كيفهم نتكسر كي البلار
المفاهيم تقلبت و الهزيمة ولات إنتصار
صيد يخوف بأنيابو لوحوش في الأدغال
أما السيد ليوم تحصر و تحبس في السيرك
الجمهور صفق للقرد خاطر الصيد كانيبال
رابك عندو هيبة مي الجمهور صفق لغيرك
البوبليك يحبك تتكلم و تكسح في الكلام
متخبي ورا ليكران يقلك أزدم القدام
نهارت لي يشيلوك يرموك في حبس ظلام
أمك بركة تبكي عليك، الكل تحطلك جام
مش أنتي لي تعلمني توريلي كيفاش نغني
مش أنا لي نرضيك ونتبدل باش تفهم فني
مش انتي لي حياتك ضاعت وانتي في دارك تتفرج
مش أنا نوسّعلك بالك بغناية مانيش مهرج
ماهوش الفلو، مش اللحن لي يخليك تفيق
مش أنا لي نخرّج راب كلام كلو تلفيق
مش أنتي قلمك خلّى طريق قدامك يضيق
مش أنا نعمل الراب ونستنى في التصفيق
قداش باش تقعد تحارب والعمر يجري بيك
قداش باش تقعد تفسّر تكتب كلام عميق
قداش مازلت باش تكتب تيتر اناليتيك
قداش باش تقعد العباد باش تشوفك دونجي بيبليك
غيرك يختار الراب لي يتعدّى في المذياع
أما أنتي مازلت واقف كي الصيد بين الضباع
الرابورات لبست ذهب والجمهور لبس قناع
ينفّر عليك ويمشي يركع للراب لي يتباع
هذاكا علاش ما نغني لحد ما نغني كان نغني لروحي
العالم هذاك لي تحلم بيه لي زارتيست مش طموحي
عندي قلم ما يركع ما يعرف استسلام
يقعد يحارب في عصر جفّت فيه الأقلام
يقعد يكتب وحدو خاطش ما عندوش أصحاب
ما فما حتى احكيلو لي تحسّو تحطّو في الراب
تحكي فيه على أقرب العباد كيفاش تدور
تحكي فيه عالدنيا بعالم مخبي بين السطور
الدنيا ماهيش طريق مسطّر، الدنيا معبي حفر
تحاول تمشي فيه وما طيحش حتى يفوت العمر
الحفر تغلّط كان تزلط وتزلق وتطيح
تقعد وحدك حد ما يسمع صوتك وقت لي تبدا تصيح
هكا الدنيا تلعب بيك كي الموج في البحر
مهما تكون عوام نهار كي تغفل تتغدر
ساعات كي تهيج الموجة تلزك للأعماق تغوصك
الدنيا تلزك تعطي للذل كارو باش تعطيك دروس
كل ما تقول تعلمت تزيد تعطيك سطاج
كل حقيقة توصللها في اللخر تطلعلك ميراج
العبد يعدّي حياتو كلها في لابغونتيساج
الدروس ما توفاش وكل درس يخلّيك عبد صاج
الأيام تجري مع كل درس تخرج عبد جديد
العبد تعلّم من الماضي تاعو ولّى يخزر لبعيد
مع كل درس تزيد تطلع انياب في فم الذيب
حضّرها للعباد لي في ظهرو عملت العيب
العبد يغلط ويزيد أما تمّا غلط وغلط
قداش من صاحب قبل توا مع الطحان تحط
لهنا في بلاد العفط كلها تحكي عالوفاء
لي معاك راجل في الصبح يولي اطحن في المساء
تعبت النساء تنسى العبد لي خلق
العبد توا ولى يكذب حتى كان صدق
خاطر قدام الشق العبد يولي رخيس
عادي يبيع صحابو بـ 200 غرام أحاسيس
خاطر العبد الخسيس كيف الكلاب لي ما تنبحش
قدامك تلبد في ظهرك تنقز ما تركحش
قداش من ضبع يحب الفضلة يحب يلعبها وحش
سامحني ربي كرهت عبادك صحبتهم ما تربحش
وجوههم ما تفرحش، قدامك تبتسم
وقت لي تتلفت في ظهرك ما تلقى كان السم
الذكورة تنقسم، كل واحد عندوتصنيف
فما الراجل، فما الكلب لي يلعبها عفيف
ساعات تسكت وتتلف باش ما توليش عنيف
تخليهم يطيحوا وحدهم كيما ورق الخريف
أما العباد ما تفهمش في بالهم بيك ضعيف
ما يعرفوش ورا الضحكة وجه مخيف
عمرها ما تغرني العين نغزر طول للقلب
حتى من غيرما تتكلم مالداخل نعرفك كلب
في ظهرك نحضر عقابك أما من غيرما نحلب
ما توصل تتعلم من دروس الدنيا كان ما تجرب
هذاك علاش ديما وحدي وما نخالط حد
القلوب كحلة والمخاخ معبية بالعقد
نقعد للأبد غامق ويشوفوك فلو
نقعد نشوف فيهم قدامي كيفاش يتحركو سلاو
نفس الكذب والماسك يتعاود ايفري نايت
القلب لكحل والمخ خامج والفم شايط
لي تحنوفي الميسنجر تمشي تلحسوفي لايت
تقعد عبد رخيس ما تغلاش حتى كي تحط الحطايت
كلها ولات دي مارك ويشوفوك ما تسوى شي
ايفيس عليك بالفيرساتشي لي شراه من منصف باي
ميت يضحك عالحي، الجيعان يضحك علي شبع
تشا تضحك عالعذراء، الصيد ضحك عليه ضبع
ما تحكيليش عالوجيعة، ىنعيشها كل يوم
الي نعيشو قبل ما نرقد يتعاود وقت لينقوم
كذب ونفاق وهموم، بلا الاصحاب لي ما دوم
الصحاب لي تعطيهم قلبك ويبيعوك بارخس السوم
طيحلي ماسك حتى من غير ما يتكلمو
ايسبوا بعضهم في ظهرهم وكي يتقبلو يسلمو
كلها ما تعرفش السوق أما يحبو يقلمو
الي يزلق ويطيح مهم يقول الوقت ظلمو
الوقت ما يظلمش احنا ظلمنا بعضنا
العباد لي عملنا معاهم الباهي كيف الكلاب تعضنا
وطلع الي داوى مرضنا مريض ماهوش طبيب
كيما الراعي يحمي الغنم وفي لخريطلع ذيب
وصعيب الكتيبة تقص وقت لي تشد لقلم
مع كل حرف وكلمة تزيد لوجيعة تتلم
في يدي القلم يقعد يكتب إلى مالا نهاية
يكتب كلام تشوف في روحك كيف لمرايا
مانيش كيفهم، مافما شي يجمعنا
ما عندماش نفس البيبليك والعباد لي اتبعنا
وماعدش صيدلنا كان الطاعة هي الي ترفعنا
الحاجة الوحيدة كي بعدنا على ربي توجعنا
عمري ما نرمي المعني، كلامي ديماد يريكت
تلبز ورايا في ظهري ونبقى نغزرلك ساكت
نغلط مانيش كامل، أماعمري ما نجامل
نمشي معاط راجل كي تغلط نولي دمار شامل
مانيش طالب شي من الدنيا، لي عندي يكفيني
مافماش حد في الدنيا نتوجع وقت خليتني
دموعي شاحت في صغري، اليوم شي ما قعد يبكيني
القلب مكسر محطم كان لكتيبة الي تنسيني
هذاك علاش نحس فقلبي يترجم حروف
في عصر وين الشهرة فايك والفنان ملهوف
نقعد زيرو مليم ما نعملش البيبليك مصروف
خليني لوطا عبد بسيط ونموت فيلسوف
يمكن كي نموت بلادي توا تعملي قدر
يمكن كلامي في المدارس يتقرى عبر
يمكن يوفى الراب كي نكتب أنا آخر سطر
يمكن وقتها نحيا خاطر بلادنا كيما القبر