Oliphant - Under der linden an der heide

Kishore Kumar Hits — Oliphant - Under der linden an der heide lyrics

Artist: Oliphant

album: Herz, Prich!: Medieval German Music

Under der linden
An der heide,
Dâ unser zweier bette was,
Dâ muget ir vinden
Schône beide
Gebrochen bluomen unde gras.
Vor dem walde in einem tal,
Tandaradei,
Schône sanc diu nahtegal.
Ich kam gegangen
Zuo der ouwe:
Dô was mîn friedel komen ê.
Dâ wart ich empfangen,
Hêre frouwe,
Daz ich bin saelic iemer mê.
Kuster mich? wol tûsentstunt:
Tandaradei,
Seht wie rôt mir ist der munt.
Dô het er gemachet
Alsô rîche
Von bluomen eine bettestat.
Des wirt noch gelachet
Inneclîche,
Kumt iemen an daz selbe pfat.
Bî den rôsen er wol mac,
Tandaradei,
Merken wâ mirz houbet lac.
Daz er bî mir laege,
Wessez iemen
(Nu enwelle got!), sô schamt ich mich.
Wes er mit mir pflaege,
Niemer niemen
Bevinde daz, wan er und ich.
Und ein kleinez vogellîn:
Tandaradei,
Daz mac wol getriuwe sîn.

Поcмотреть все песни артиста